थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ अगहन २६४६, मंगर ]
[ वि.सं १३ मंसिर २०७९, मंगलवार ]
[ 29 Nov 2022, Tuesday ]

धनगढी उपमहानगरपालिका आईसोलेशन निर्माणमे जुटल

पहुरा | ५ असार २०७७, शुक्रबार
धनगढी उपमहानगरपालिका आईसोलेशन निर्माणमे जुटल

पहुरा समाचारदाता
धनगढी, ५ असार ।
प्रदेशसे स्थापना करल कोरोना अस्पतालमे संक्रमितके उपचार कैना ठाउँ नइहुइलपाछे धनगढी उपमहानगरपालिका अपने आईसोलेशन कक्ष निर्माणमे जुटल बा ।
धनगढी उपमहानगरपालिका वडा नं १५ मे रहल जडिबुटी प्रशोधन केन्द्रके भवनमे आईसोलेशन कक्ष तयार हुइटी रहल बा । धनगढी उप–महानगरपालिका क्षेत्रीय शहरी विकास आयोजना अन्तरगत निर्माण रहल खाली भवनमे अब्बेक लाग झण्डे २८ शैयाके आईसोलेशन तयारीके चरणमे पुगल बा । हम्रे चिकित्सकसंग सल्लाह लेले बाटी धनगढी उपमहानगरपालिकाके प्रमुख नृपबहादुर वड कहलै, ढेरमे १ सय सैया समके आईसोलेशन निर्माण करे सेक्ना राय चिकित्सकहुक्रे डेले बाटै ।
यी आईसोलेशन भवनमे धनगढी उप–महानगरपालिका भिटरके कोरोना संक्रमितहुकनके केल उपचार कैना नगरप्रमुख वड बटैलै । सेती प्रादेशिक अस्पतालहे प्रदेश सरकारसे कोरोना अस्पतालके रुपमे तयार करसेफे संक्रमितहुकनके संख्या बढाइल ओरसे आईसोलेशनमे धारे पर्ना बिरामीसेफे ठाउँ पैले नइहुइट नगरप्रमुख वड कहलै, सक्कु स्थानीयतहसे अपनही आईसोलेशन कक्ष बनाई सेक्लेसे उहाँक चाप घटे सेकी ।
उप–महानगरपालिकासे तयार करे लागल आईसोलेशनमे सैया मिलैना, बिजुलीबत्ती ओ उपकरण जडान कैना काम हुइटी रहल नगरप्रमुख वड बटैलै । उहाँ कहलै, नगरके स्वास्थ्यकर्मी ओ प्राविधिक टिम रातदिन खटके काम करटी रहल बा । धनगढी उप–महानगरपालिका कोभिड उपसमितिके संयोजक नारायण बराल एक दुई दिनमे संचालनमे नाने सेक्ना करके आईसोलेशन कक्ष निर्माणके काम हुइटी रहल बटैलै । प्रदेश सरकारसे सुरुमे गेटा मेडिकल कलेजहे कोरोना अस्पतालके रुपमे तयारी करल हुइलेसेफे अब्बेक अवश्यकता अनुसार आईसोलेशन कक्ष उहे थप करे सेक्जाइट संयोजक बराल कहलै, बिरामीके चाप हुइटी रहना सेती प्रादेशिक अस्पतालहे कोरोना अस्पताल बनाईबेर संक्रमितहुकनके उपचारमे समस्या हुइल हो । गेटा मेडिकल कलेजमे ५ सय से ढेर आईसोलेशन कक्ष बनाइ सेक्ना ठाउँ बा बराल कहलै,उहाँ सुरुमे बनाइल हुइलसे प्रदेशभर आईसोलेशनके समस्या हुइना नइरहे । अब्बे स्थानीय तह समस्यामे रहल उहाँ बटैलै ।

जनाअवजको टिप्पणीहरू