२ जनप्रतिनिधिहुकनके छावा संलग्न रहल कुटपिट घटना मिलेमतोमे

पहुरा समाचारदाता
धनगढी, १५ असार । २ जनप्रतिनिधिके छावासहितके अराजक युवाहुकनके मरासन्न कुटपिटसे एक युवा सक्त घाहिल हुइल रहिट ।
कैलालीके गौरीगंगा नगरपालिकाका वडा सदस्यद्वय चिरञ्जिवी जोशी ओ अमृता बिकके छावासहित युवाहुकनके कुटपिटसे एक युवक घाहिल हुइल रहिट ।
ईलाका प्रहरी कार्यालय मसुरियाके प्रहरी नायव निरिक्षक डम्मर बहादुर थापाके अनुसार अट्वारके रात उ युवाहुकनके कुटपिटसे गौरीगंगा नगरपालिका ८ के राजकुमार कठरियाके २१ वर्षिय छावा कमान्डो कठरिया घाहिल हुइल हुुइट ।
कुटपिटमे वडा सदस्य जोशीके छावा निरज जोशी ओ वडा सदस्य बिकके छावा अर्जुन बिकसहित गौरीगंगा नपा ४ के दीपेन्द्र सुनार, राजेन्द्र बराल, विवेक बराल, वडा नंं ९ के सुरेश चुनाराके कुटपिटमे संलग्नता रहल प्रहरी नायव निरिक्षक थापा जनैलै ।
अट्वारके रात आपन छावाहे हेलमेट ओ बोतल प्रहार करके घाहिल बनाइल बटैटी उहाँ आपन परिवार असुरक्षित हुइल दुखेसो सुनैलै ।
ओस्टके, उ युवाहुकनबीच यहिसे आघे फेन पटक–पटक झैझगडा हुइटी आइल ओ प्रहरीसम उहाँहुकनके विवाद आइल प्रहरी नायव निरिक्षक थापा बटैठै । घटनासे आघे फेन उ यूवाहुक्रे प्रहरी कार्यालय आइल बटागिल बा ।
यसेबीच उ कुटपिटके घटनाहे मिलेमतोमे ओरुवागिल बा ।
दर्ता हुइल जाहेरी फिर्ता लेहुवाके मिलेमतोमे ओरवागिल बा । आपसी छलफलसे घटनाहे मिलाइक पर्ना दबाब आइलपाछे जाहेरी फिर्ता लेहल राजकुमार कठरिया बटैलै ।