क्वारेन्टाइन खाली हुइलपाछे विद्यालयमे प्रशासनिक कार्य शुरु

पहुरा समाचारदाता
सुखड, १५ असार । कैलालीके घोडाघोडी नगरपालिका क्वारेन्टाइनके लाग प्रयोग करल विद्यालय खाली हुइल पाछे विद्यालय सरसफाइ कैके विद्यार्थी भर्ना, छात्रवृत्ति तथा पुस्तक वितरण कार्य शुरु करले बा ।
घोडाघोडी–८, तारानगरमे रहल राष्ट्रिय माध्यामिक विद्यालयके प्रधानाध्यापक सुबोधकुमार शर्मा असारके पहिल अँठ्वारसम क्वारेन्टाइनके रुपमे प्रयोग हुइल विद्यालय खाली हुइलपाछे सरसफाइ कैके विद्यार्थी भर्ना तथा पुस्तक वितरण कार्य शुरु करल बटैलै । उहाँ कहलै–विद्यार्थी भर्नासँगे पुस्तक वितरण फेन कैना हुइल ओरसे कोभिड–१९ हे मध्यनजर कैके भौतिक दूरी कायम करटी ढिउर भिडभाड नाइ हुइना मेरके काम कैना व्यवस्था मिलैले बाटी ।’ भिडभाड कम करक लाग कक्षा १० हे शुरुमे पुस्तक वितरण करल ओ क्रमसँग अन्य कक्षाके विद्यार्थीहे पुस्तक वितरण तथा भर्ना कैना उहाँ बटैलै । उ नगरपालिकामे जेठके अन्तसम विद्यालयमे व्यवस्था करल क्वारेन्टाइन भरिभराउ रहे । वहाँके ५१ सामुदायिक विद्यालयमे करिब तीन हजार पाँच सय मनै क्वारेन्टाइनमे रहलमे मापदण्ड पुगल सक्कु जनहनहे घर पठाइलपाछे विद्यालय खाली हुइल हो । असार पहिल अँठ्वार करिब सक्कु विद्यालय खाली हुइल रहे । विद्यालय खाली हुइलपाछे विद्यालयके सरसफाइसँगे नगरपालिका शैक्षिक कार्यक्रम कैना परिपत्र करलपाछे काम शुरु करल हो ।
बालज्योति आधारभूत विद्यालयके प्रधानाध्यापक भुपेन्द्र कुँवर असार ६ गते विद्यालयमे क्वारेन्टाइन खाली हुइलपाछे सरसफाइ कैके अँट्वारसे विद्यार्थी भर्ना, पुस्तक वितरण तथा छात्रवृत्ति वितरण कार्य शुरु करल बटैलै ।
घोडाघोडी नगरपालिकामे रहल ५१ विद्यालयमे अँट्वारसे नियमित विद्यार्थी अभिलेख राख्न, पुस्तक वितरण, छात्रावृत्ती वितरणलगायत कार्य शुरु करल घोडाघोडी नगरपालिका शिक्षाशाखा प्रमुख उमेशराज रेग्मी बटैलै ।
उहाँ कहलै, ‘नगरके एक दुई विद्यालयबाहेक सक्कु विद्यालय
स्यानिटाइज होसेकल ओरसे चालु अर्थिक बरस भिट्टर छात्रवृत्ति, पुस्तक वितरणलगायत विद्यार्थी अभिलेख करसेक्ना विद्यालयहे परिपत्र करल बा ।’