समितिसे टमान योजनाके अनुगमन

पहुरा समाचारदाता
हसुलिया, १७ असार । कैलारी गाउँपालिकास्तरीय अनुगमन समिति चालु आर्थिक वर्षमे गाउँपालिकाके टमान ठाउँमे सञ्चालित योजनाके अनुगमन करले बा ।
गाउँपालिकास्तरीय अनुगमन समितिके संयोजक एवम् गाउँपालिकाके उपाध्यक्ष लक्ष्मी सत्गौंवाके नेतृत्वमे अनुगमन कैगिल हो ।
समितिसे वडा नम्बर ५ मे सञ्चालित लेवल दुईके सिलाईकटाई तालिम, आशारामके घरसे छोटीपलिया प्रहरी चौकीसमके सडक कालोपत्रे योजनाके अनुगन कैले बा ।
अस्टेक, छोटीपलियासे मोहनपुरसमके सडक स्तरोन्नति, वडा नम्बर ७ के मोहनपुर गाउँमे सडक स्तरोन्नति, राष्ट्रिय मावि भुईयाफाँटाके भवन निर्माण योजनाके अनुगमन कैगिल बा ।
अस्टेक, वडा नम्बर ५ स्थित मनिकापुर विद्यालयके भवन निर्माण योजना, सामुदायिक वन समन्वय समितिके हल ओ बोटबिरुवाके बेर्ना उत्पादन कार्यके फेन अनुगमन कैगिल बा ।
अनुगमन समिति वडा नम्बर १ स्थित मनाउ जैना डगरमे निर्मित कल्भर्ट ओ ओहे वडामे सञ्चालित मोटरसाइकल तालिमके फेन अनुगमन कैगिल कैलारी गाउँपालिकाके कर्मचारी रवीन्द्रकुमार चौधरी जानकारी डेलै ।
अनुगमन टोलीमे समितिके सदस्यद्वय खडक बिक, रञ्जिता चौधरी, गाउँपालिकाके योजना शाखा प्रमुख सन्तोषकुमार चौधरी, प्राविधिक सुनिल चौधरी लगायत सहभागी रहिट ।