सुदूरपश्चिममे ठप २४३ मे कोरोना पुष्टि
पहुरा समाचारदाता
धनगढी,१७ असार । सुदूरपश्चिम प्रदेशमे बुधके रोज ठप दुई सय ४३ जनहनमे कोरोना पुष्टि हुइल बा ।
पछिल्का २४ घण्टामे राष्ट्रिय जनस्वास्थ्य प्रयोगशाला काठमाडौँ, विर अस्पताल, कर्णाली स्वास्थ्य विज्ञान प्रतिष्ठान ओ धनगढी प्रयोगशालामे हुइल परीक्षणमे दुई सय ४३ जनहनमे कोरोना पुष्टि हुइल स्वास्थ्य मन्त्रालयसे नियमित मिडिया विफ्रिङमे जानकारी डेहल बा ।
राष्ट्रिय जनस्वास्थ्य प्रयोगशालामे बुधके हुइल परीक्षणमे अछामके १० महिला ओ ४९ पुरुष करके ५९ जाने, बझाङके चार महिला ओ १४ पुरुष करके १८ जाने, बाजुराके दुई महिला ओ पाँच पुरुष करके सात जाने, कैलालीके चार महिला ओ १० पुरुष करके १४ जाने ओ कञ्चनपुरके एक पुरुषमे कोरोना पुष्टि हुइल स्वास्थ्य मन्त्रालयके प्रवक्ता डा. जागेश्वर गौतम बटैलै ।
ओस्टेक करके बिर अस्पतालके प्रयोगशालामे हुइल परीक्षणमे डोटीके सात महिला ओ ११ पुरुष करके १८ जाने, अछामके १५ महिला ओ ५१ पुरुष करके ६६ जाने, बाजुराके ६ महिला ओ १२ पुरुष करके १८ जाने, कैलालीके दुई महिला ओ ८ पुरुष करके १० जाने, कञ्चनपुरके दुई महिला ओ सात पुरुष करके नौँ जनहनमे कोरोना पुष्टि हुइल उहाँ जनैलै ।
ओस्टेक सेती प्रादेशिक अस्पतालके प्रयोगशालामे कैगिल परिक्षणमे तीन जाने कोरोना सक्रमित ठपल बाटै । सेती प्रादेशिक अस्पतालके सूचना अधिकारी दिलिपकुमार श्रेष्ठके अनुसार धनगढी–५ के एक जाने, कैलारी गाउँपालिकाके एक जाने ओ बैतडी दोगडाकेदारके एक जनहनमे कोरोना संक्रमणके पुष्टि हुइल बा ।
