थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १७ अगहन २६४६, शनिच्चर ]
[ वि.सं १७ मंसिर २०७९, शनिबार ]
[ 03 Dec 2022, Saturday ]

वर्तमान सरकार स्वार्थ ओ फाइदामे लिप्टः रावल

पहुरा | १९ असार २०७७, शुक्रबार
वर्तमान सरकार स्वार्थ ओ फाइदामे लिप्टः रावल

पहुरा समाचारदाता
धनगढी, १९ असार ।
प्रमुख प्रतिपक्ष दल नेपाली कांग्रेसके नेता डाक्टर रणबहादुर रावल वर्तमान सरकार अपन स्वार्थ ओ फाइदामे लिप्ट रहल बटैले बाटै ।
मुक्तिका लागि साझा अभियान सुदूरपश्चिम प्रदेशसे शुकके रोज जिल्ला प्रशासन कार्यालय कैलालीके मुख्य प्रवेशद्धारमे डेहल सडक धर्ना कार्यक्रमहे सम्बोधन करटी जनताके कार्य कैनासेफे अपन स्वार्थ ओ फाइदाके लिप्ततामे लागल आरोप लगैले रहिट ।
वडका पहुना रहल डाक्टर रावल अब्बेक सरकारके सक्कु कार्य असफल हुइल कहटी संविधानमे अपनही ऐन नियम बनैना अपनही उल्लंघन करटी रहल बटैलै । उहाँ रुकुम चौरजहारीमे हुइल घटनाके लाग अपने ओ अपन पार्टीके साथ समर्थन रहल प्रतिवद्धता व्यक्त करलै । सरकार जनताके पक्षमे नइहो, उहाँ कहलै–‘राज्यसे जातीयताके नाउँमे विभेदकारी कार्य करले बा ।’ जनताहे शान्ति, सुरक्षा ओ न्याय नइडेना कार्य सरकारसे करटी रहल उहाँ बटैलै ।

ओस्टेक कार्यक्रमममे राष्ट्रिय जनमोर्चाके जिल्ला अध्यक्ष लछीराम आचार्य रुकुम चौरहजारीमे हुइल घटनाके दोषीहे तत्काल सरकारसे कार्वाहीके दायरामे नाने पर्ना बटैलै । उहाँ दलितसे प्रेम करके हत्या हुइल केल नइहुके गैरदलितके समेत हत्या हुके राज्य कार्वाहीके सट्टा उदासीन डेखल आरोप लगैलै ।
विवेकशील साझा पार्टीके सुदूरपश्चिम संयोजक गोपाल हमाल जातीय ओ छुवाछुटके अन्त्यके लाग अपन घरसे सुरुवात करे पर्ना बटैलै । उहाँ भाषण करके केल नइहुइना ओरसे छुवाछुतके नाउँमे हुइल आडम्वरहे बाहेर नानके घरसे सुरुवात कैना आग्रह करलै ।
मुक्तिका लागि साझा अभियानके संयोजक प्रेम विसीके सभापतित्वमे हुइल सडक धर्ना कार्यक्रममे स्वागत मन्तव्य परिवार दलके सुदूरपश्चिम संयोजक खडक नागरी करले रहिट । कार्यक्रममे सुदूरपश्चिम प्रदेश सभा सदस्य टेकबहादुर रैका, महिला मानव अधिकार सञ्जालके केन्द्रीय सदस्य निर्मला बागचन, नेपाल दलित संघके केन्द्रीय उपाध्यक्ष छत्र टेलर, जनता समाजवादी पार्टीके जिल्ला अध्यक्ष गयाप्रसाद कुश्मी, तरुण दलके केन्द्रीय प्रतिनीधि तथा युवा नेता अमृत विसी, मुस्लिम समाजके मायानिगार अन्सारी लगायतके उपस्थिति रहल रहे ।

मुक्तिका लागि साझा अभियानसे रुकुम चौरजहारीके घटना लगायत देशभर हुइल जातीय हत्या एवम् विभेदकारी विरुद्ध आन्दोलनक कार्यक्रम करटी आइल बा । यी आघेफे धनगढीमे चौरजहारी घटनाके विरुद्धमे मोटरसाइकल ¥याली, विरोध प्रदर्शन करटी आइल बा । साझा अभियानसे मानव सेवा कार्य अन्तर्गत त्रिनगर उच्च माविके क्वारेन्टिनमे रहल २ सय जनहनहे एक हप्तासम खाना खवैना सहयोग करल रहे ।

जनाअवजको टिप्पणीहरू