कैलालीके पूर्वी क्षेत्रके २० घर डुबानमे

पहुरा समाचारदाता
धनगढी, १९ असार । कैलालीके पूर्वी क्षेत्र डुबानमे परल बा । टमान लडिया ओ खोल्हवामे आइल बाह्र गाउँघरमे पेलके डुबान हुइल हो ।
बिफेक रात भारी वर्षा हुइलपाछे लडियो ओ खोल्हवामे बाह्र आइल बा । वर्षाके कारण भजनी नगरपालिका, बर्दगोरिया गाउँपालिका, जोशीपुर गाउँपालिका ओ घोडाघोडी नगरपालिकामे कुछ घर डुबानमे परल जिल्ला प्रहरी कार्यालय कैलाली जानकारी डेले बा ।
कार्यालयके प्रहरी नायब उपरीक्षक प्रतीक विष्टके अनुसार काँढा लडियामे बाहं आके जोशीपुर गाउँपालिका–३, राजीपुर ओ वडा नम्बर ४ फरिया गाउँमे कैके करिब २० घर डुबानमे परल बा । घरमे दुई फिटउप्प्रसम पानी पुगल जनागिल बा ।
अस्टेक, फरियास्थित हिरालाल चौधरीके घरमे पानी पेलके कच्ची घर भस्काइल विष्ट जानकारी डेलै । ‘घरके सक्कु सदस्यहे सुरक्षित स्थानमे सारल बा,’ उहाँ कहलै, ‘घरबाहेक और क्षति हुइल नैहो ।’
अस्टेक, बर्दगोरिया गाउँपालिका–६ स्थित बासकोटी (घैला) खोलामे बाह्र आके खोल्हवा किनारमे रहल करिब १६ घर डुबानमे परल बा । बाह्रसे एक गोरु ओ स्थानीयसे पोखरामे पालल मच्छी बहाइल प्रहरी नायब उपरीक्षक विष्ट जानकारी डेलै ।
अस्टेक, घोडाघोडी नगरपालिका–२ टनकपुरमे लक्ष्मी न्यौपानेके घर फेन डुबानमे परल जिल्ला प्रहरी कार्यालय जानकारी डेले बा । भजनी नगरपालिका–१ ओ ३ वडामे फेन कुछ घर डुबानमे परल बा । डुबानमे परल घरके विवरण संकलन करना कार्य हुइटीरहल इलाका प्रहरी कार्यालय भजनीके इन्चार्ज जनक धामी बटैलै । ‘यी वडामे पहिलसे डुबान हुइठ,’ उहाँ कहलै, ‘घर डुबलेसे फेन भारी समस्या हुइल नैहो । प्रहरीके टोली ओहोर खटल बा ।’
रात हुइल वर्षाके कारण जिल्लाके पूर्वी क्षेत्रमे रहल काँढा, कान्द्रा, पथरैयालगायत लडियामे बाह्र आइल जनागिल बा । भजनी नगरपालिकाके कुछ भूभाग जलमग्न हुइल वडा नम्बर १ के स्थानीय गंगाराम चौधरी बटैलै ।