थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]

कोरोनासे पत्रकारके जागिर नै धरापमे : उप–प्रमुख भट्ट

पहुरा समाचारदाता | २० असार २०७७, शनिबार
कोरोनासे पत्रकारके जागिर नै धरापमे : उप–प्रमुख भट्ट

धनगढी, २० असार । धनगढी उप–महानगरपालिकाके उप–प्रमुख सुशीला मिश्र भट्ट देशके बरवार होल्डीङ्ग सेन्टरके व्यवस्थापन धनगढी उप–महानगरपालिका करल बटैले बाटी ।
धनगढी उप–महानगरपालिकाके सहयोगमे नेपाल पत्रकार महासंघ कैलाली शाखासे आयोजना करल कोभिड–१९ पत्रकारीता अभिमूखीकरण कार्यक्रममे बोल्टी उप–प्रमुख भट्ट उ बातके जानकारी कराइल हुइटी । कोरोनाके महामारी पाछे भारतसे अइटी रहलहुक्रनहे सुरुमे व्यवस्थापन कैना ठाउँहे होल्डीङ्ग सेन्टर कहिजाइठ् । उप–प्रमुख भट्ट कहली– ‘कैलालीके त्रिनगरभन्सार नाका होके अइटी रहल हजारौ व्यक्तिहुक्रनहे नवदुर्गा माध्यमिक विद्यालयमे स्थापना करल होल्डीङ्ग सेन्टरमे राखके व्यवस्थापन कैके पठैले बाटी ।’ सुदूरपश्चिम प्रदेशके किल नाइहोके देशभरके व्यक्तिहुक्रनके सुरुके व्यवस्थापन यहैसे करले बाटी ।
‘भारतसे अइटी रहलहे खानापानी खवाइना ढिउर मनकारीहुक्रे सहयोग करटी रहल बाटै,’ उप–प्रमुख भट्ट कहली, ‘यम्ने पत्रकारहुक्रनके फेन योगदान रहल बा ।’ सुरुमे धनगढी उप–महानगरपालिकासे त्रिनगर भन्सार नाकामे हेल्थडेस्क राखके काम करले रहे । यकर साथे उप–प्रमुख भट्ट महिलाके लाग छुट्टे क्वारेन्टीन आपन छुट्टे आईसोलेशन स्थापना कैके कोरोना संक्रमितके उपचार ओ उद्धार करल बटैली ।
एक औरे प्रशंगमे बोल्टी उप–प्रमुख भट्ट अन्य क्षेत्रसे पत्रकारिता जगत कोरोनाके मारमे ढिउर परल बटैली । श्रमजिवी पत्रकारहुक्रनके जागिर नै धरापमे परल ओरसे तीनु तहके सरकार यम्ने गम्भीर हुइ पर्ना जरुरी रहल बा । कुछ गलत व्यक्तिके कारण सिंङ्गो पत्रकारीता क्षेत्र बदनामीत हुइ नाइ डेना उप–प्रमुख भट्ट आग्रह करली ।
कार्यक्रममे नेपाल पत्रकार महासंघके सुदूरपश्चिम प्रदेश महासचिव योगश रावल कोरोना महामारीके कारण पत्रकार बेरोजगार बन्न अवस्था सिर्जना हुइ लागल बटैलै । नेपाल पत्रकार महासंघके पूर्व केन्द्रिय सदस्य दिलबहादुर छत्याल पत्रकारीता क्षेत्र जटिल अवस्थामे आइल ओरसे तिनु तहके सरकार पत्रकारके पेशागत सुरक्षाके लाग कार्यक्रम लाने पर्ना बटैलै । कार्यक्रम पत्रकार महासंघ कैलालीके अध्यक्ष जगत साउदनके अध्यक्षता हुइल रहे ।

जनाअवजको टिप्पणीहरू