मृतक महिलामे कोरोना नाइ रहल पुष्टि

पहुरा समाचारदाता
धनगढी, २१ असार । कैलालीके गोदावरीमे होम क्वारेन्टिनमे रहल बेला मृत्यु हुइल एक महिलामे कोरोना नाइ रहल पुष्टि हुइल बा ।
जेठ २६ गते भारतसे आइल गोदावरी नगरपालिका १० कि ३८ बर्सिया महिलाके शुकके अचानक स्वास्थ्यमे समस्या आइलपाछे मृत्यु हुइल रहे । उहाँ निर्धारित समय स्थानीय तहसे तयार करल क्वारेन्टिनमे बैठके घर गैल रही ।
शुकके मृत्यु हुइल महिलाके शनिच्चरके स्वाब संकलन कैके परीक्षण करेबर कोरोना संक्रमण नाइ रहल स्वास्थ्य शाखा प्रमुख बीर बहादुर कुँवर बटैलै । ओहकान शनिच्चरके नै अन्त्येष्टि करल उहाँ जानकारी डेलै । मृतक महिलामे प्यारालाइसिस ओ रक्तचापके समस्या रहल जनाइल बा ।