सरकार मुडभेड ओ अराजकता नाने खोजटाः प्रतिपक्षी

पहुरा समाचारदाता
धनगढी, २२ असार । प्रतिपक्षी दल नेपाली काँग्रेस ओ जनता समाजवादी पार्टीके प्रदेशसभा सदस्यहुक्रे वर्तमान सरकार मुडभेड ओ अराजकता निम्ताई खोजल आरोप लगैले बाटै ।
असहमतिके बाबजुतफे अँटवारके सकारे तोकल प्रदेश सभा बैठक आघे बह्राइलपाछे रुष्ट हुइल प्रमुख प्रतिपक्षी दल नेपाली काँग्रेस ओ जनता समाजवादी पार्टीसे पत्रकार सम्मेलनके आयोजना करके वर्तमान सरकार दुई तिहाइके दम्भमे मनोमानी ढंगसे आघे बह्रल गैल बटैले रहिट ।
प्रमुख प्रतिपक्षी दल नेपाली कांग्रेस संसदीय दलके नेता डा. रणबहादुर रावल प्रतिपक्षीहे वेवास्ता करटी सदन सुचारु करके सरकारसे अपनही मुडभेडके स्थिति सृजना करल बटैलै ।
‘हम्रे व्यक्तिगत स्वार्थपूर्ति नइहुके प्रदेशवासीहे कोरोना कहरसे बचैना ठोस योजना नानो कहटी आइल बाटी,’ डा. रावल कहलै– ‘मने सरकारसे हमार बाट नइसुन्के गैरजिम्मेवारी पूर्ण आघे बह्रल बा ।’ उहाँ प्रदेशवासीके हितके लाग माग रख्टी आइल मने यी सरकार जोखिम उप्पर जोखिम ठप्टी गैल बटैलै ।
कोरोनाके नाउँमे प्रदेश सरकार ९३ करोड खर्च करले बा, मने एक ठो चिटकनी समेत खरिद करे नइसेक्के क्वारेन्टिनमे रहल महिला बलात्कृत हुके आत्मदाह करल उहाँ कहलै । यी सरकार पिसिआर पोजेटिभ रहल व्यक्तिहुकनहेफे घर पठैले बा, ओकरफे हम्रे हिसाब डेले बाटी हमार पहिल माग ओइनहे प्रथामिकता डेके आइसोलेशनमे राखो कहली मने वेवस्ता करटी समाज, परिवारहे सक्रमिट बनैना काम करल डा. रावल कहलै ।
संसदीय दलके नेता डा. रावल कहलै,–‘विगतमे प्रवासीउप्पर गैरप्रवासीके जैसिन व्यवहार कैगिल, विदेशमे रहल नेपाली डाडु भैयनहे सहजे स्वदेश नानेक लाग सुदूरपश्चिमके धार्चुला, झुलाघाट, गडडाचौकी ओ गौरीफन्टा नाकामे स्वास्थ्यकर्मी सहिट होल्डिङ सेन्टरके व्यवस्था कैना कहटी–कहटी सरकार वेवास्ता करले बा ।’कोरोनासे यी
सरकारहे भ्रष्टाचार कैना मौका मिललफे उहाँ आरोप लगैलै ।
जनता समाजवादी पार्टीके ससदीय दलके नेता कृष्ण चौधरी प्रतिपक्षीहे नइटेरके प्रदेश सरकार मनोमानी ढंगसे बह्रके कम्युनिष्टके असली रुप डेखाइल बटैलै । कोरोनाके कारण सुदूरपश्चिम प्रदेशमे भयवाह अवस्था अइटी रहल मने वर्तमान सरकार सम्वेदनशिल नइहुइल उहाँ कहलै । ‘हम्रे कोरोनासंग सम्बन्धित सक्कु चिज व्यवस्थित करटी खर्च सदनमे पेश करो कहटी बाटी,’ दलके नेता चौधरी कहलै,–‘मने वर्तममान सरकार गम्भीरतापूर्वक नइलेके आघे बह्रल बा ।’
‘विधि ओ प्रक्रिया मिचके दुई तिहाईके दम्भमे सरकार आघे बढटी जैना लोकतन्त्र विपरितके कार्य हो, सदनमे कम्युनिष्ट शासन लागे खोज्न हो,’ उहाँ कहलै–‘यिहीसे निकास निकरनाके सट्टा मुडभेड ओ अराजकता निम्त्यइटी जैना हो ।’
प्रतिपक्षी दलसे क्वारेन्टिन व्यवस्थित बनाई पर्ना, कारोना नियन्त्रणके लाग खर्च करल ९३ करोड बजेटके विवरण सार्वजनिक करे पर्ना, क्वारेन्टिनमे रहल नागरिकहे पिसिआर जाँच करके रिपोर्ट आइलपाछे केल घर पठाई पर्ना लगायतके माग करटी प्रदेशसभा बैठक अवरुद्ध करटी आइल बाटै ।

प्रतिपक्षीके विरोधबिच प्रदेश सभाके बैठक संचालन
प्रतिपक्षी दलहुकनके अवरोधके विचफे सुदूरपश्चिम प्रदेश सभाके अँटवारके बैठक संचालन कैगिल बा । सकारे ८ बजे हुइना कहल प्रदेशसभा बैठक कुछ ढिला करके संचालन हुइल रहे । प्रतिपक्ष दल नेपाली काँग्रेस ओ जनता समाजवादी पार्टीके विरोधके विचमे सभामुख अर्जुनबहादुर थापा बैठक आघे बह्रैले रहिट ।
बैठक शुरु हुइटीकी प्रतिपक्षी दलके प्रदेशसभा सदस्यहुक्रे आ–अपन ठाउँसे उठके नाराबाजी करके विरोध करटी–करटीफे सदन आघे बह्रागिल रहे । उहे क्रममे आर्थिक मामिला तथा योजनामन्त्री झपटबहादुर बोहरा बजेट उप्परके छलफल सुरु होए कहटी प्रस्ताव बैठकमे प्रस्तुत करले रहिट ।
प्रतिपक्षी दलसे नइहुई कहटी–कहटी उ प्रस्ताव बहुमतसे पारित करटी अँटवारके प्रदेशसभा बैठक स्थगित कैगिल रहे । दुसर बैठक सोम्मार दिनके ३ बजे तोकल बा ।
प्रमुख प्रतिपक्षी दल नेपाली काँग्रेस ओ जनता समाजवादी पार्टी कोरोना भाइरस संक्रमण नियन्त्रण तथा रोकथाममे प्रदेश सरकार प्रभावकारी रुपमे काम नइकरल कहटी विरोध करटी आइल बाटै ।