सिक्टा सिँचाइ आयोजनाके पानी खेतुवामे

बाँके, २२ असार । बाँकेमे निर्माणाधीन राष्ट्रिय गौरवके सिक्टा सिँचाइ आयोजनासे राप्ती लडियक पानी खेतुवामे पुगलपाछे किसान हर्षित हुइल बाटै । आयोजनासे धान लगैनीहे ध्यानमे राखके पश्चिमी मूल नहर ओ पू्र्वी नहरसे पानी सञ्चालन करलपाछे किसानके खेत सिँचित हुइल बा ।
नहरके पानी खेतबारीमे पुगलपाछे यी वर्ष समयमे धान लगाई पाइल डुडुवा गाउँपालिका वडा नं ५ कम्दीके किसान मानबहादुर मगर बटैलै । ‘सदा धान लगैना बेला आकाशे पानीके भर परजाए, अब्बे सिक्टाके पानी आइलपाछे खेती किसानीमे ढेर सहजुल हुइल बा’,उहाँ कहलै ।
सिक्टाके पानी खेतबारीमे पुगलपाछे कम्दी गाउँक किसान तरकारी खेती करके नगद आर्जन करे लागल डुडुवा –५ के वडाध्यक्ष परशुराम बुढाथोकी जानकारी डेलै । ‘सिक्टाके पानी आइलपाछे अब्बे किसान आलु, गोभी ओ सागलगायत तरकारी खेतीसेफे आम्दानी कैना सफल हुइल बाटै ।, उहाँ कहलै, ‘सिक्टाके पानी खेतुवामे पुगलपाछे समयमे खेती किसानी करे पाके किसान खुशी हुइल बाटै ।’
आयोजनाके निर्देशक लोकबहादुर थापा धान लगैनीहे ध्यानमे राखके पश्चिमी मूल नहरके जेठी नालासम ओ पू्र्वी नहरके साविक राजकुलोसे टमान शाखा तथा प्रशाखा नहरमार्फत किसानके खेतबारीमे पानी पुगल बटैलै । उहाँक अनुसार पश्चिमीमूल नहरअन्तर्गत रहल सिधनिया, डुडुवा ओ जेठी नाला शाखा ओ पू्र्वी नहरके साविक राजकुलो सिँचाइके पुरान नहर हुइटी किसानके खेतबारीमे पानी छोरल हो ।
‘हम्रे वैशाख पहिल हप्तासे नहरमे नियमित पानी छोरल हुई, जेठ १५ पाछे क्रमशः टमान शाखा ओ प्रशाखासे किसानके खेतबारीसम पानी पुगैना काम हुइटी रहल बा,’ आयोजना निर्देशक थापा कहलै, ‘आयोजनाके सिँचाइ लक्ष्यके करीब आधाजटरा क्षेत्रफलमे सिक्टाके पानी पुगल बा ।’
अब्बेक अवस्थामे पश्चिमी मूल नहरअन्तर्गत डुडुवाके पुरान नहर ओ कुछ नालामे राखके १५ हजार हेक्टर ओ पूर्वी नहरअन्तर्गत राजकुलो सिँचाइके पुरान नहरमार्फत एक हजार हेक्टर करके १६ हजार हेक्टरहे १२ महिना धानखेतीहे सहजुले सिँचाइ डेहे सेक्ना आयोजना निर्देशक थापा जानकारी डेलै ।
यी आघे परीक्षण कैना क्रममे दुई चो उ आयोजनाके पश्चिम मूल नहर पहिल चो ढकेरीस्थित झिझरी खोला ओ दुसरा चो चङगाई नाला लग्गे भत्कल रहे । अब्बे दुई महिनासे ढेर समय सञ्चालन हुकेफे नहरमे कौनो समस्या देखल नइहो ।
सिक्टा सिँंचाइ आयोजनाके कुल बजेट रु २५ अर्ब रहलमे रु १४ अर्ब थप बढाके पाँच वर्षभिटर काम सेक्ना करके रु ३९ अर्बके संशोधित गुरुयोजना बनाइल बा । पूर्वी ओ पश्चिमी मुख्य नहरसंगे शाखा, उपशाखा ओ प्रशाखा नहरसहित दुई वर्षमे सिंचाइके मुख्यमुख्य सञ्जाल बनसेक्न आयोजना निर्देशक थापाके कहाई बा ।
नेकपा बाँके क्षेत्र नं १ के अध्यक्ष सूर्य ढकाल पर्याप्त मात्रामे वर्षा नइहुइलेसेफे यी वर्ष सिक्टाके नहर पुगल ठाउँमे किसान समयमे धानके ब्याड रख्न ओ धान लगाई पाइल जानकारी डेटी आब बेमौसमी तथा व्यावसायिक तरकारी खेती करके सिँचाइके उपयोग करे पर्ना बटैलै ।

– एजेन्सी