डडेल्धुरा अस्पतालमे स्थापना करल पिसीआर मेसिनके उद्घाटन
पहुरा समाचारदाता
धनगढी, २२ असार । डडेल्धुरा अस्पतालमे स्थापना करल पिसीआर मेसिनके उद्घाटन करल बा । सोम्मारके जिल्ला समन्वय समिति डडेल्धुराके संयोजक गणेश भट्ट मेसिनके औपचारिक उद्घाटन करल हुइट ।
हयुम्यानिटी फाउण्डेसन नेपाल ओ सुदूरपश्चिम समाज अमेरिकाके पहलमे जनस्तरसे संकलन करल रकमसे उक्त पिसीआर ल्याब स्थापना करल हो । उद्घाटन कार्यक्रममे फाउण्डेसनके अध्यक्ष श्याम तायलसहितके टिम उपस्थित रहल रहे ।
फाउण्डेनससे पिसिआर स्थापनाके लाग हालसम १ करोड ६ लाख ६७ हजार ५ सय ९५ खर्च हुइल जनाइल बा । उक्त मेसिन स्थापनाके लाग हालसम टमान दाताहुक्रनसे ९७ लाख संकलन हुइल बा । कलेसे प्रतिवद्धता करल रकम संकलन हुइना बाँकी फेन रहल फाउण्डेनस जनैले बा ।
जनसहभागितामे सम्पन्न उक्त अभियान नेपालके लाग एक उदाहरणीय रहल कहटी सक्कु सहयोगीहे हयुम्यानिटी फाउण्डेसनके अध्यक्ष तायल आभार व्यक्त करल रहिट ।
स्थापना हुइल पिसीआर मेसिनसे बिफेक रोजसे नै परीक्षण सुरु होसेकल बा । धनगढीस्थित सेती प्रादेशिक अस्पतालके प्रयोगशालाके इञ्चार्ज रमेश शाही ओ काठमाडौंसे आइल इञ्जिनियर सहितके टोली पिसीआर मेसिनके गुणस्तर परीक्षण करल रहिट ।
अब्बे डडेलधुरा अस्पतालके ल्याब इञ्चार्ज इश्वारी भुसालके नेतृत्वमे ६ जनहनके टिमसे उक्त मेसिनसे कोरोना परीक्षण करटी रहल बा ।
पिसीआर मेसिन स्थापना हुइलसंगे सुदूरपश्चिमके पहाडी जिल्लाबासीहे कोरोना परीक्षण कैना सहज हुइना विश्वास लेहल बा ।
