डुबानमे मोतीचौक
धनगढी, २३ असार । सामान्य वर्षासे फेन धनगढी उपमहानगरपालिका वडा नं ७ मोतीचौक स्थित दर्जन ढिउर पसल सहित घरमे पानी पैठ्ना करल बा ।
उचित ढल निकास नाइहोके सामान्य पानी परलेसे फेन पानी जमके पसल, घर लगायतमे पैठ्ना करल हो । पानी जमके पसलमे पैठ्ना करल मोतीचौक स्थित राज सपिड्ड प्वाइन्टके सञ्चालक राज चौधरी बटैलै । ढल निकास नाइ होके हल्का पानी परटी किल पसलमे पानी पैठ्ना करल उहाँ बटैलै ।
‘सामान्य वर्षा हुइल कि, यहाँके व्यापारीहे पसलमे पानी पैठ्ना डर रहठ्’, उहाँ कहलै–‘यिहीसे व्यापारीहे विजोग पारठ् नै, व्यापार व्यवसायमे फेन समस्या पारडेहठ् ।’ रातके पानी परलेसे झन पसलमे पानी पैठ्ना चिन्ता रहल उहाँ बटैलै ।
ढल निकास, नाली सरसफाई नाइ होके मोती चौक स्थित राज सपिड्ड प्वाइन्ट, विशेष बुक, वर्षा फेन्सी, मिना फेन्सी, जानवी, रत्न स्टोर लगायत दर्जन ढिउर पसलमे पानी पैठ्ना करल बा ।
ढल निकास तथा नाली सरसफाईके लाग स्थानीय जनप्रतिनीधीहे बराम्बार आग्रह करलेसे फेन कोइ नाइ सुनडेना मोतीचौकके व्यापारीहुक्रनके गुनासो रहल बा ।
