ठेकेदार ओ कर्मचारीन्के कमैना भाँरा, राजश्व असुलीमे वेवास्ता
लखन चौधरी
धनगढी, २३ असार । कैलालीके धनगढी उपमहानगरपालिका–४ चटकपुरस्थित १ विघा जमिनमे बधस्थल निर्माणसहित व्यवस्थित तरकारी, फलफूल तथा माछामासु बजार बनैना कहिके सार्वजनिक निजी साझेदारी (पीपीपी) अन्तरगत समझौता करल ९ बरस पूरा हुइलल बा ।
मने नते समझौता अनुसार व्यवस्थित तरकारी, फलफूल तथा माछामासु बजार बने सेकल हो, नते राजश्व संकलन । सुदूरपश्चिम प्रदेशके राजधानी समेत रहल धनगढीके मुटुभिट्टर भौतिक संरचनासहितके उ जमिन केवल ठेकेदार ओ कर्मचारीहुकनके दुध खैना गैया किल बने पुगल हो ।
हाल उहाँ रहल गोदामघरमे एकठो कोल्ड स्टोर, तरकारी तथा फलफूलके थोक पसल, होटल, किरानालगायतके पसल सञ्चालन करगिल बा । शौचालय समेतके व्यवस्था नैकरल उ क्षेत्रमे वर्षातमे हिलाम्मे हुइटी आइल बा । कलेसे उहाँसे निक्रन फोहोर व्यवस्थापन नैहुुइलपाछे दुगन्धित हुइटी आइल लम्मा समय उहै व्यवसाय करटी आइल विनोद शाह बटैलै ।
कागजमे सीमित समझौता
संघीय मामिला तथा स्थानीय विकास मन्त्रालयके स्वामित्वमे रहल उ जमिन धनगढी उपमहानगरपालिकाहे भोगाधिकार तथा संरक्षण अधिकार प्राप्त हुइल बा । कलेसे २०६८ साल भदौ २८ गते नेपाल सरकारके सचिव स्तरीय निर्णय अनुसार जग्गामे बनल गोदाम घर पाछे मन्त्रालयसे मागल समयमे फिर्ता करना कैके धनगढी उपमहानगरपालिकाहे प्राप्त हुइल हो ।
२०६७ चैत १४ गते धनगढी उपमहानगरपालिका ओ धनगढी उपमहानगरपालिका २ के स्थानीय ओम पाठकबीच पीपीपी अन्तगरत १५ वर्षे समझौता करगिल बा । उ समझौता अनुसार निर्धारित जग्गाभिट्टर न्युनतम ३५ ठो तरकारी, १४ ठाे फलफूल, १० ठाे माछा मासुके खुद्रा बजार, बायोग्यास प्लान्ट १ स्लटर हाउसलगायतके पसल निर्माण करेक परना उल्लेख बा । कोल्ड स्टोरसहितके २ ठो रात्रिकालीन भण्डारण कक्षके निर्माण तथा सञ्चालन करेक पर्ना फेन करल बा ।
निर्धारित जग्गाभिट्रे पशुपक्षीके फरक–फरक वध स्थल निर्माण करेक पर्ना ओ वधस्थलसे निक्रन फोहरमैलाहे व्यवस्थापन करेक लाग उ भवनके पछिल्का भागमे बायोग्यास प्लान्ट निर्माण करेक पर्ना उ समझौतामे उल्लेख बा ।
समझौतामे ढिउरम १ वर्ष निर्माण अवधि कायम करगिल बा । मने समझौता अनुसार हालसम कौनो फेन संरचना निर्माण नैकरल पागिल हो । ठेकेदार पाठक कुछ आपन लगानीमे भाडा असुुलीके उदेश्यसे टहरा निर्माण करल पागिल हो ।
असुली केन्द्र, मने नगरपालिकाहे हात लागल शून्य !
निर्माण करल कौनो टहराके लम्बाई अनुसार ते कौनो टहराके प्रति सटरके हिसाबसे भाडा असुल हुइटी आइल बा । सटरके प्रति फिट ५४० रुपैयाँसम भुुक्तानी करटी आइल बटागिल बा । मने कौनो सटरके प्रति सटर ३ हजारसे साढे ५ हजार रुपैया भाडा पाठकहे बुझैटी आइल व्यापारीहुक्रे बटैले बाटै । सटरमे होटल व्यवसाय करटी आइल गीता गुरुड्ड मासिक ५ हजार १३० रुपैयाँ भाडा बुझैटी आइल ओ प्रत्येक २ वर्षमे १० प्रतिशतके दरसे भाडा बृद्धि करटी जैना समझौता हुइल उल्लेख कर्ली ।
अत्रही किल नाई, गोदाम घरमे कोल्ड स्टोर सञ्चालन करटी आइल सुन्दर सुदूरपश्चिम टे«ड प्रालि किल मासिक ६१ हजार ६ सय रुपैया भाडा ठेकेदारहे बुझैटी आइल बा । दोसर पक्ष मानगिल ठेकेदार पाठक उहाँ रहल टमान सटर तथा स्टलसे मासिक करिब ६ लाखके हाराहारीमे भाडा असुली करटी आइल बाटै ।
मने ठेकेदार पाठक हालसम २ वर्षके किल रोयल्टी बुझाइल पागिल बा । धनगढी उपमहानगरपालिकाके राजश्व शाखा प्रमुख तथा आलेप अधिकृत लेखनाथ ओझा ठेकेदार पाठक वार्षिक १ लाख रुपैया रोयल्टी बुझाइक पर्र्ना बटैटी हालसम आव २०७५/२०७६ मे १ लाख २० हजार ओ आव २०७६/२०७७ मे १ लाख १० हजार करके २ लाख ३० हजार रुपैया किल बुनाइल बटैलै ।
लम्मासम गोदाम हस्तान्तरणके विषयमे साविक जिल्ला विकास समिति ओ धनगढी उपमहानगरपालिकाबीचके विवादके कारण परियोजना २०७४ कुवारसे किल सञ्चालनमे आइल आलेप अधिकृत ओझाके कहाइ बा ।
समझौता हुइल ९ वर्ष हुइल, रोयल्टी पछिल्का २ वर्षके किल का हे ? कना लोकान्तरके जिज्ञासामे आलेप अधिकृत ओझा कहलै–‘यकर मुख्य कारण विवाद हो । ठेकेदारसे काम करे नैपाइल, २०७४ से किल शुरुवात हुइल हो । ओहे कारणले किल राजश्व मिलानसहित २ वर्षके राजश्व आइल हो । मने समझौता अनुसार पाइक पर्ना बिल्गाइठ । जौन मेयर सावके अध्यक्षतामे रहल सार्वजनिक निजी साझेदारी समितिसे कारवाही हुइठ ।’
समझौता अनुसार काम नैहुइलेसे समझौता रद्द करे सेकजिना ओ समझौता बमोजिम बुझाइक पर्र्ना रकम समयभिट्टर नैबुझैलेसे सरकारी बाँकी सरह असुल उपर कर्ना कहल बा । मने उपमहानगरपालिका असुली ओहोर बेखबर बिल्गाइल बा ।
समझौता अनुसार पाइक पर्र्ना राजश्वमे उपमहानगरपालिकाके कुछ कर्मचारी ओ ठेकेदारबीच लेनदेन चल्टी आइल फेन आरोप लग्टी आइल बा । मर्मत सम्भारमे खर्च हुइल डेखैटी राजश्व बाफत उठ्न रकम कर्मचारीहुक्रे आपन गोझु भर्ना काम करटी आइल स्रोतके दाबी बा । मने आलेप अधिकृत ओझा हालसम ठेकेदार पाठक २ बरसके किल राजश्व (रोयल्टी) बुझाइल दाबी करटी आइल बाटै । जौन दाखिला होसेकल बा ।
समझौता रद्द करके सपिड्ड कम्प्लेक्सके तयारीमे बाटी : नगरप्रमुख वड
यहेबीच नगरप्रमुख नृपबहादुर वड तरकारी, फलफूल तथा माछामासु बजार क्षेत्रमे बहुउदेश्यीय सपिड्ड कम्प्लेक्स निर्माणके तयारीमे रहल बटैले बाटै । उ मौजुदा बजार तथा समझौता समय सापेक्ष नगरके विकास नैहुइना बटैटी उहाँ सपिड्ड कम्प्लेक्स निर्माणके तयारीमे रहल ओ जेकर लाग डीपीआर समेत तयार करल जानकारी डेलै । जेम्ने नगर विकास समिति डेढ अर्ब लगानी करटी रहल बटैटी नगरप्रमुख वड समझौता रद्द करेक लाग ठेकेदार ओ उपमहानगरपालिकाबीच छलफल जारी रहल उल्लेख कर्लै ।
ओस्टके समझौताके दोस्रो पक्ष मानगिल ठेकेदार पाठक आपन उप्पर अन्याय हुइल जिकिर कर्लै । समझौता १५ बरसके हुइलेसे फेन कबु जिविस संगके लफडा ते कबुु सपिड्ड कम्प्लेक्सके अवधारणाके कारण ढुक्कसे काम करे नैपाइल बटैलै । मने उचित क्षतिपूर्ति डेलेसे अप्ने उ स्थान छोर्ना तयार रहल बटैलै ।
