थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ सावन २६४६, अत्वार ]
[ वि.सं २९ श्रावण २०७९, आईतवार ]
[ 14 Aug 2022, Sunday ]

गाली गलौचके शैलीमे सांसद प्रेम आले (भिडियाेसहित)

पहुरा | २३ असार २०७७, मंगलवार
गाली गलौचके शैलीमे सांसद प्रेम आले (भिडियाेसहित)

पहुरा समाचारदाता
धनगढी, २३ असार ।
प्रतिनिधि सभा सदस्य प्रेम आले सर्वसाधारणहुकन अपशब्द प्रयोग करके गालीगलौचके शैलीमे उत्रल बाटै । उहाँके उपशब्द बोलल भिडियो फेन सामाजिक सञ्जालमे भाइरल बा ।
कैलाली जिल्लास्थित टमान सामुदायिक वनमे लागु हुइल वैज्ञानिक वन कार्यक्रमके स्थलगत अनुुगमन करे पुुगल सांसद आले ‘टाउको तल गर म को हुँ चिन्छस् ?’ कहटी गाली गलौच करल भिडियो भाइरल हुइल हो ।
वैज्ञानिक वनके नाममे व्यापक फँडानी हुइल कहटी सरकारसे संसदीय छानविन उपसमिति बनैले बा । सार्वजनिक लेखा समिति अन्तर्गत बनल उपसमितिके सदस्य रहल सांसद आले अनुुगमनके क्रममे सामुदायिक वनके पदाधिकारी ओ तल्लो स्तरके वन कर्मचारीहुकन अपशब्द प्रयोग करल ओ धम्क्याइटी नेगल बटागिल बा ।
डोटीसे निर्वाचित नेपाल कम्युनिष्ट पार्टी (नेकपा)के सांसद आले छानविन समितिके संयोजक प्रदीप यादव सहित सोम्मारके रोज कैलाली पुगल रहिट । यहेबीच समिति कैलालीके महोन्याल गाउँपालिका–३, फलेविसौना पुगल रहे । सांसद आले जनकल्याण सामुदायिक वनके अध्यक्ष जनक गिरीहे ढिउर झपारल रहैं । आपन उ कार्यशैलीसे सांसद आले अप्ने सांसद पदके गरिमाके धज्जी उराइल आरोप लागल बा ।
सामुदायिक वनके अध्यक्ष गिरी आपनहे सांसद आले झपारल बात सुनैटी कहलै– ‘म को हुँ, चिन्छस् । के मुखमा के हेरेको टाउको तल गर । तँ बढ्ता कुरा गर्छस् । हामी माननीय हुँ मेरो मुखमा हेरेर कुरा गर्ने तँ को होस् ? तेरो वनमा कुन ठेकेदारको लगानी छ भन ?’
सरकारसे लागु करल वैज्ञानिक वन कार्ययोजना अनुसार काम करल तथा कार्यान्वयनमे लागल बटैटी उहाँ सक्कुहनके सामने सांसद जसिन मनै अमानवीय ढंगसे तल्लो स्तरके शब्द प्रयोग करके झापरल बटैलै ।
दलबलसहित अनुगमन करे पुगल उहाँ गाली गलौचसहित धम्कीके शैलीमे उत्रलपाछे वनके पदाधिकारी ओ वन कर्मचारी त्रसित हुइल बाटै ।
नाउ नैबटैना सर्तमे एक वन कर्मचारी कहलै– ‘मोर मनैनके फाईल फेकाके औरे जहन ठेक्का डेना ?’
उपसमितिसे सत्यतथ्य छानविन कर्ना हो न कि सर्वसाधारणहुकन धम्क्याइटी नेंग्ना हो । गालीगलौच करटी नेंग्न सांसदके गरिमा विपरित रहल वन कर्मचारी बटैठै ।
हाल वैज्ञानिक वनके अनुगमनमे आइल सांसद आलेहे उल्टे वन माफियाके आरोप लग्टी आइल बा ।

जनाअवजको टिप्पणीहरू