धनगढी–१७ हे आँमगाउँ बनैना अभियान

पहुरा समाचारदाता
धनगढी, २६ असार । धनगढी उपमहानगरपालिका वडा नं १७ हे आँम गाउँके पहिचान दिनके लाग काम करे सुरु करल बा ।
उपमहानगरपालिकासे एक गाउँ एक उत्पादन कना नीति लेहल अनुरुप वडा नं १७ धुर्झन्ना, पथरी, डमौलियाके प्रत्येक घरमे अनिवार्य रुपमे दुई ठो
टेलुवा लगाई लागल हो । उपमहानगरपालिकासे २ ठो आँमके टेलुवा निःशुल्क उपलब्ध करैले बा कलेसे घरधनीसे अनिवार्य रुपमे दुई ठो टेलुवा लगाई पर्ना व्यवस्था करल बा ।
धनगढीके नगरप्रमुख नृपबहादुर वडसे वडा नं १७ और वडाके तुलनामे पाछे परल ओरसे विकास निर्माणके काममे प्राथमिकतामे पारल बटैलै । उहाँ वडा नं १७ कृषिके साथे फलफुल खेतीके लाग सम्भाव्य ठाउँ हुइल ओरसे आँम गाउँके रुपमे विकास करे लागल बटैलै । नगरप्रमुख वड विफे केल वडामे पुगके स्थानीयके बारीमे अपनही आँम लगाके सहयोग करलै  । नगरप्रमुख वड अपने निर्वाचित हुके अइटी भोट बराबर बोट, ओकरपाछे धनगढीके जनसंख्या बराबर बोटके अभियान सुरु करल बटैलै ।
वडा नं १७ के अध्यक्ष माधवराज राना नगर प्रमुख वडके पहलमे आँम गाउँ अभियान अन्तरगत २ हजार ९ सयके हाराहारीमे आँमके टेलुवा वडाबासीमे उपलब्ध कराइल बटैलै । धनगढी उपमहानगरपालिका आरयूडिपीके सहयोग ओ विकासका लागि यूवा ऐक्यवद्धताके साझेदारीमे आँमके टेलुवा उपलब्ध कराइल संस्थाके अध्यक्ष विनय लामा बटैलै । ओस्टेक करके धनगढी उप–महानगरपालिका ७ मे रहल सृजना स्मृति पार्कमेफे नगरप्रमुख वडसे बृक्षा रोपण करले रहिट ।