घरभाडा ओ बैंक ब्याज मिनाहाके माग करटी व्यवसायी आन्दोलनमे
काठमाडौं, २६ असार । न्युरोड लगायतके क्षेत्रमे छोट व्यवसायी आन्दोलनमे उत्रल बाटै । ओइने टमान नारा लिखल ब्यानरसहित न्युरोडमे जम्मा हुके वर्षाके बीचमे फे प्रदर्शन करल हुइट ।
नेपाल राष्ट्रिय व्यवसायी महासंघसे लकडाउन अवधिके बैंक ब्याज ओ घरभाडा मिनाहाके माग करटी आन्दोलन सुरु करल हो । महासंघसे बुधके काठमाडौंमे पत्रकार सम्मेलन करके आन्दोलनके घोषणा करल रहे ।
कोरोना भाइरसके कारण यी बेला समग्र उद्योगी–व्यवसायीहुक्रे बहुट कठिन अवस्थाके सामना करटी रहेबेरफे सरकारसे बेवास्ता करल कहटी व्यवसायी आन्दोलित हुइल हुइट ।
नेपाल राष्ट्रिय व्यवसायी महासंघके अध्यक्ष नरेश कटुवालके अनुसार समस्याबारे जानकारी करैटी करैटीफे राज्यसे बैंकके ब्याजदर, किस्ता तिरना भाका तथा घरभाडाके विषयमे उचित निर्णय नइलेहल ओरसे आन्दोलन सुरु करल हो ।
व्यवसायीसे लकडाउन अवधिभरके ब्याज मिनाहा कैना माग राखल बाटै । ऋणके किस्ता तथा ब्याज भुक्तानीके भाका एक वर्षपाछे सरे पर्ना, कर्जाके ब्याजदर ८ प्रतिशतमे झारे पर्ना तथा लकडाउन अवधिभरके भरघाडा मिनाहा करे पर्ना बटैले ।
