गाडी नाइ चलैना यातायात केन्द्रीय महासंघके घोषणा

काठमाडौं, २६ असार । सार्वजनिक यातायात केन्द्रीय महासंघ यथास्थितिमे सार्वजनिक सवारीके साधान नाइ चलैना घोषणा करले बा । महासंघसे शुकके पत्रकार सम्मेलन कैके यथास्थितिमे यातायात सञ्चालन करे नाइ सेक्ना कहटी ५ बुँदे माग आघे सारल बा ।
सरकारसे पूर्व तयारी विना सार्वजनिक यातायात सञ्चालन कैना कहिके अव्यवहारिक ओ खतरनाक कदम चालल् महासंघके अध्यक्ष होम प्रसाद अधिकारी बटैलै । अपनेहुक्रे आघे सारल ५ बुँदे माग पूरा हुइलेसे किल गाडी चलाइ सेकजैना महा सचिव भरत नेपाल बटैलै । महासंघके मागमे विश्व स्वास्थ्य संगठनसे तोकल मापदण्ड अनुसार यातायात मजदुर ओ आम यात्रुहुक्रनके स्वास्थ्यहे दृष्टिगत कैके सम्पूर्ण व्यवस्था हुइ पर्ना, बैंक किस्ता तथा ब्याजमे पुनर्तालिकीकरण हुइ पर्र्ना, कागज पत्र, कर राजश्वमे बन्दाबन्दी अवस्थाके कर छुट हुइ पर्ना, बन्दाबन्दीके अवस्थाके बिमा प्रिमियम छुट समयावधि समायोजन लगायत बावै ।
सार्वजनिक यातायात साधनमे विश्व स्वास्थ्य संगठनसे मापदण्ड अनुसारके व्यवस्था करडेहे पर्ना, यातायात मजदुर तथा आम यात्रुके स्वास्थ्यके पूर्ण व्यवस्था सहित हस्पिटालिटीके व्यवस्था हुइ पर्र्ना, २०७७ आश्विन मसान्तसम बैंक किस्ता नाइ लग्ना व्यवस्था हुइ पर्र्ना, बन्दबन्दी अवधिके कर छुटके साथे एक बरससम जरिवाना नाइ लग्ना मेरके म्याद थप हुइ पर्र्ना लगायतके माग रहल बावै । साथे सरकारसे तोकक बमोजिम टमान प्रकृतिके सवारी साधनके सिट मापदण्ड बमोजिम यात्रु राखके सञ्चालन करे नाइ सेक्ना महासंघ जनैले बा ।
५ बुँदे माग पुरा नाइ हुइलेसे यातायात व्यवसायीके लगानीके वचत पत्र व्यवसायीहे डेके बाँकी बैंक ऋण जिम्मा लेना ओ आपन सवारीहे राष्ट्रियकरण करे पर्र्ना सार्वजनिक यातायात केन्द्रीय महासंघ नेपालके माग रहल बा ।