कैलारी गाउँपालिकाके आइसोलेशनसे २१ जाने कोरोना जितके घर लौटलै

पहुरा समाचारदाता
हसुलिया, २६ असार । कैलारी गाउँपालिकाके आइसोलेशनसे शुकके रोज २१ जाने कोरोना जितके घर लौटल बाटै ।
गाउँपालिका अन्तर्गत टमान वडामे स्थापना करल आइसोलेशनमे बैठल २२ जानेमध्ये २१ जाने कोरोना जितके घर लौटल हुइट । उहाँहुकनके पिसीआर रिपोर्ट नेगेटिभ आइलपाछे शुकके फूलमाला घलाके घर पठाइल बा ।
गाउँपालिकाके स्वास्थ्य शाखा प्रमुख वीरेन्द्र सापकोटा पिसीआर रिपोर्ट नेगेटिभ आइलहुकनहे घर पठाइल बटैलै । उहाँ वडा नम्बर ५ पवेरास्थित जनकल्याण माविसे ७ जाने, राष्ट्रिय मावि बिचैपुर ओ गरिमा प्रावि ५÷५ ओ टेंढीसे ४ जाने डिस्चार्ज हुइल ओ जनकल्याण मावि पवेरामे बैठल १ जहनके रिपोर्ट अइना बाँकी रहल बटैलै ।
गाउँपालिका अन्तर्गत रहल सक्कु क्वारेन्टाइनमे बैठलहे घर पठागिल बा । अब्बे दीपेन्द्र मावि हसुलियामे स्थापना करल क्वारेन्टाइनमे ३५ जाने किल रहल स्वास्थ्य प्रमुख सापकोटा बटैलै ।