थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४६, सोम्मार ]
[ वि.सं ३० श्रावण २०७९, सोमबार ]
[ 15 Aug 2022, Monday ]

विपदसे बचेक् लाग कैलालीमे हाई अलर्ट

पहुरा | २७ असार २०७७, शनिबार
विपदसे बचेक् लाग कैलालीमे हाई अलर्ट

पहुरा समाचारदाता
धनगढी, २७ असार ।
विपदसे बचेक् लाग कैलाली जिल्लामे उच्च सतर्कता अप्नागिल बा । कुछ दिन याहोर परल लग्तारे परल पानीसे देशके टमान ठाउँमे ढिउर जनधनके क्षति हुइल बेला बेला कैलालीमे फेन प्राकृति विपदसे बचेक लाग उच्च सतर्कता अप्नागिल हो ।

कैलालीके प्रमुख जिल्ला अधिकारी यज्ञराज बोहराके संयोजकत्वमे रहल जिल्ला विपद व्यवस्थापन समिति शनिच्चरके रोज कैलालीके टमान स्थानीय तहके प्रमुुख तथा प्रतिनिधीहुकनसे छलफल करटी विपद व्यवस्थापनके लाग उच्च सतर्कता अप्नाइल जनैले बा ।

जेकर लाग विपद व्यवस्थापनके पूर्व योजना तयार करगिल बा । जिल्ला प्रशासन कार्यालय कैलाली उ बैठकसे विपद प्रतिकार्यके योजना पारित करटी ओहे अनुसारके तयारी करटी रहल जनैले बा ।

जिल्ला विपद व्यवस्थापन समितिके संयोजक समेत रहल प्रमुख जिल्ला अधिकारी यज्ञराज बोहरा विपद प्रतिकार्यके लाग टमान कलस्टर बनाके जिम्मेवारी बाडफाँड करल बटैटी जिल्लाके सुरक्षामे रहल नेपाल प्रहरी, सशस्त्र प्रहरी ओ नेपाली सेना करके तीनु सुरक्षा निकायहे हाई अलर्टमे बैठ्ना निर्देशन डेहल जानकारी डेलै ।

प्राकृतिक विपदमे परल उद्दार तथा राहतके कार्यक्रमके लाग फेन पूर्व तयारी करल प्रजिअ बोहरा बटैलै । जिल्लाके स्थानीय तहहुकनहे विपद प्रतिकार्य योजना बनाके विपदके पूर्व तयारी करेक लाग, लडिया कटान एवं डुबान क्षेत्रके पहिचान करके उहाँ बसोबास करटी आइल स्थानीयहुकन सुरक्षित स्थानमे राखेक् लाग नेपाल रेडक्रस सोसाइटी, मर्सिकोरलगायत दातृ निकायहुकन सहयोगके लाग अनुरोध समेत करल जनागिल बा ।

कैलालीमे भजनी नगरपालिका, टीकापुर नगरपालिका, जोशीपुर गाउँपालिका, कैलारी गाउँपालिका, धनगढी उपमहानगरपालिका, घोडाघोडी नगरपालिका क्षेत्रस्थित कर्णाली नदी, मोहना नदी, खुटिया, काँडा, कान्द्रा लडिया लग्गे पर्ना पर्न बस्ती लडिया कटान एवं डुबानके जोखिममे रहल स्थानीय प्रशासन जनैले बा ।

जिल्लामे रहल टमान लडिया तथा बरवार डुन्ड्रामे पानीके सतह मापन करटी आइलओरसे वहाव बह्रलपाछे सर्तकता अप्नाइक लाग अपिल करटी आगिल बा । मने अभिनसम लडियामे पानीके वहाव सामान्य रहल प्रमुख जिल्ला अधिकारी बोहरा बटैलै ।

मने जिल्लाके भजनी नगरपालिकाके कुछ क्षेत्र कुछ दिन आघे आइल बाह्रसे डुबानमे परल रहे । उ क्षेत्र हरेक बरस डुबानमे समेत परटी आइल बा ।

जिल्ला विपद व्यवस्थापन समितिके निर्णयके पूर्णपाठ

जनाअवजको टिप्पणीहरू