ज्येष्ठ नागरिक बहुउद्देश्य भवनके नगर प्रमुख वडसे उद्घाटन

पहुरा समाचारदाता
धनगढी, २७ असार । विश्व जनसंख्या दिवसके अवसरमे फुलवारी ज्येष्ठ नागरिक समितिके ज्येष्ठ नागरिके लाग बहुउद्देश्य दिवा सेवा केन्द्र भवनके उद्घाटन तथा संस्थाके प्रथम बार्षिक साधारण सभा शनिच्चरके सम्पन्न हुइल बा ।
संस्थाके नव निर्मित दिवा सेवा केन्द्र ओ संस्थाके पहिल साधारण सभाके धनगढी उपमहानगरपालिकाके नगर प्रमुख नृप बहादुर वड उद्घाटन करल रहिट । उक्त दिवा सेवा केन्द्र भवन धनगढी उपमहानगरपालिकाके अनुदान ओ संस्थाके कोषसे करिब १५ लाखके लागतमे निर्माण सम्पन्न करल संस्थाके अध्यक्ष होम प्रसाद गौतम बटैलै ।

ज्येष्ठ नागरिकहुक्रनके टमान सवालमे पैरवी करटी आइल संस्था फुलवारी ज्येष्ठ नागरिक समितिसे २०७१ सालसे ज्येष्ठ नागरिकहे संगठित करटी समुह परिचालन मार्फत टमान गतिविधी करटी आइल बा । यी संस्थासे ज्येष्ठ नागरिकके लाग ज्येष्ठ नागरिक सम्मान,ज्येष्ठ नागरिकके स्वास्थ्य परिक्षण, जाडके समयमे जारके कारण अप्थ्यारोमे परल ज्येष्ठ नागरिकहे कम्बल वितरण, गर्मीके समयमे झुल वितरण ओ ज्येष्ठ नागरिक मैत्री जीविकोपार्जनके लाग टमान तालिमके ब्यवस्था करटी आइल बा ।
२०७१ सालसे अनौपचारिक समुहके रुपमे रहल संस्था २०७५ साल औपचारिक रुपमे दर्ता होके आपन गतिविधि करटी रहल बा । विपद्के बेला ज्येष्ठ नागरिकहुक्रनहे कैसिक सुरक्षित राखे सेकजाइ कना विषयमे टमान खाले तालिम ओ जनचेतनामुलक कार्यक्रम संस्थासे करटी आइल संस्थाके सचिव भुमिनन्द ओझा बटैलै ।

संस्थासे ज्येष्ठ नागरिकहुक्रनके जीविकोपार्जनमे सहयोग पुगाइक लाग घुम्तीकोष परिचालन करले बा । हाल संस्था संग ६ लाखसे ढिउर रकम रहल सचिव ओझा बटैलै ।
भवन उद्घाटन तथा साधारण सभा कार्यक्रममे धनगढी उपमहानगरपालिकाके नगर उपप्रमुख सुशिला मिश्र भट्ट धनगढी वडा नं. १८ के वडा अध्यक्ष मुरारी अधिकारी, फाया नेपालके निवर्तमान अध्यक्ष एवं सामाजिक अभियन्ता शेर बहादुर बस्नेत लगायत मनतब्य राखल रहिट ।
संस्थाके अध्यक्ष होम प्रसाद गौतमके अध्यक्षतामे सम्पन्न उक्त कार्यक्रममे संस्थाके बार्षिक प्रतिवेदन,आर्थिक प्रतिवेदन पेश करटी आगामी कार्यकालके लाग होम प्रसाद गौतमके अध्यक्षतामे नौ सदस्यीय लौव कार्यसमिति समेत चयन करल बा ।