पहिरो पीडित २२ परिवारहे राहत वितरण

पहुरा समाचारदाता
धनगढी, २७ असार । ह्युमानिटी फाउण्डेसन नेपालसे बझाङके केदारस्यु गाउँपालिका– ८ मल्लेसीके पहिरोसे पीडित २२ परिवारहे राहत सामग्री वितरण करल बा ।
पहिरोमे परिवारके सदस्य गुमाइल तथा पहिरोसे घर पुहाइल कारण विस्थापित हुइल २२ परिवारहे ह्युमानिटी फाउण्डेसनसे एक महिनाके लाग खाद्यान्न लगायतके राहत सामग्री वितरण करल हो ।
ह्युमानिटी फाउण्डेसन नेपालके प्रतिनिधि तथा पत्रकार बसन्त प्रताप सिंह शनिच्चरके रोज वडा नम्बर ८ के अध्यक्ष गणेश बोहरा मार्फत पहिरो पीडित परिवारहे राहत सामग्री वितरण करल हुइट । फाउण्डेसनसे प्रति परिवार एक क्विन्टलके दरसे २२ परिवारहे २२ क्विन्टल चाउर, प्रति परिवार पाँच किलोके एक क्विन्टल १० किलो मिक्स दाल, प्रति परिवार तीन लिटरके दरसे ६६ लिटर खैना तेल, प्रति परिवार तीन किलो दरसे ६६ किलो नोन, प्रति परिवार पाँच जनहनहे एक/एक ब्रसके दरसे एक सय १० ब्रस, प्रति परिवार एक कोलगेटके दरसे २२ ठो भारीवाला कोलगेट, एक सय १० ठो लहैना साबुन ओ एक सय १० ठो कपडा धुइना साबुन वितरण करल हो ।
गैल अठुवार गाउँपालिका– ८ मल्लेसी गाउँमे आइल पहिरोमे परके ६ जानेक ज्यान गैल रहे । पहिरोमे परके एक जाने बेपत्ता हुइल बाटै । २२ परिवार पहिरोमे घर भँठल कारण विस्थापित बाटै । विद्यालय ओ गोठमे आश्रय लेटी रहल पहिरो पीडित परिवारहे छाक टरना समस्या हुइल जानकारी पाइलपाछे फाउण्डेसनसे राहत सामग्री वितरण करल हो ।
जहाँ विपत्ति उहाँ ह्युमानिटी फाउण्डेसन कना नाराके साथ स्थापना करल फाउण्डेसनसे यी आघे भारतसे आइल २६ हजारसे नेपालीहे सीमामे निशुल्क खाना वितरण कैनाके साथे कोरोनाके परीक्षणसे बञ्चित सुदूरपश्चिमके सात ठो पहाडी जिल्लाके बासिन्दाके सुविधाके लाग डडेल्धुरामे दुई अठुवार आघे पीसीआर मेसिन स्थापना करल रहे ।