कैलारी गाउँपालिकाके सक्कु सङ्क्रमित ठिक हुके घर लौटलै
पहुरा समाचारदाता
हसुलिया, २८ असार । कैलालीस्थित कैलारी गाउँपालिकाके कोरोना सङ्क्रमित सक्कु व्यक्ति ठिक हुके घर लौटल बाटै । हालसम सङ्क्रमण पुष्टि हुइल २७ सक्कु जाने कोरोना जिटके घर लौटल हुइट । कोरोना पुष्टि हुइल २७ मध्ये २२ जनहनहे गाउँपालिकाके आइसोलेसन ओ पाँच जनहनहे धनगढीमे धारल रहे ।
गाउँपालिकाके आइसोलेसनमे रहल सक्कु सक्कु व्यक्ति कोरोना जिटके घर लौटल स्वास्थ्य संयोजक विरेन्द्र सापकोटा जानकारी डेलै । ओस्टेक करके, धनगढी आइसोलेसनमे रहल पाँचु जाने फे ठिक हुके घर लौटल उहाँ बटैलै । सापकोटाके अनुसार पीसीआर परीक्षण रिपोर्ट नेगेटिभ आइल २१ जनहनहे कुछ दिन आघे डिस्चार्ज करल रहे । गाउँपालिकाके आइसोलेसनमे बाँकी रहल एक जाने सङ्क्रमितके परीक्षण रिपोर्टफे नेगेटिभ आइलपाछे अँटवारके रोज उहाँहे घर पठाइल बा ।
वडा नम्बर ५ के पवेरास्थित जनकल्याण माध्यमिक विद्यालयके आइसोलेसनमे रहल उ व्यक्तिहे गाउँपालिकाके अध्यक्ष लाजुराम चौधरी लगायतसे फूलमाला लगाके बिदाई करले बाटै । सक्कु सङ्क्रमित कोरोना जिटके घर लौटलपाछे गाउँपालिका कोरोना मुक्त हुइल संयोजक सापकोटा बटैलै । ‘अब्बेक लाग सतप्रतिशत व्यक्ति ठिक हुके घर लौटल बाटै, उहाँ कहलै ।
उ गाउँपालिकाके क्वारेन्टाइनमे हाल ४० जाने व्यक्ति रहल बाटै । ३४ जाने व्यक्ति हसुलियास्थित दीपेन्द्र माध्यमिक विद्यालयमे निर्माण करल क्वारेन्टाइन ओ छ जाने व्यक्ति बैजपुरस्थित सर्वोदय आधारभूत विद्यालयमे निर्माण करल क्वारेन्टाइनमे राखल बाटै ।
क्वारेन्टाइनमे रहल एक जाने बाहेक बाँकी सक्कु भारतसे लौटल व्यक्ति हुइट । क्वारेन्टाइनमे रहल १० जनेक परीक्षण रिपोर्ट अइना बाँकी रहल बा । ओस्टेक करके, ३० जनेक स्वाब संकलन करके परीक्षणके लाग पठाइल बा ।
