निजी प्राविधिक शिक्षालय महासंघके प्रदेश समिति गठन
पहुरा समाचारदाता
धनगढी, २९ असार । सुदूरपश्चिम प्रदेशमे रहल निजी प्राविधिक शिक्षालय महासंघ नेपालसे धनगढीमे प्राविधिक शिक्षालयके हकहित संरक्षणके लाग सोम्मारके रोज धनगढीमे कार्यक्रम हुइल बा ।
२०५८ सालमे स्थापना हुइल महासंघहे क्रियाशिल बनाके सक्कु प्राविधिक धार रहल शिक्षालयके उन्नती प्रगतिसँगे शैक्षिक गुणस्तरके निम्ती प्रदेशमे रहल सक्कु निजी शिक्षालयहे व्यवस्थित बनाके आघे बह्रना उद्देश्यके साथ कार्यक्रम हुइल रहे ।
कार्यक्रमके उद्घाटन सिटिईभिटी सुदूरपश्चिम प्रदेश कार्यालयके निर्देशक नलराम देवकोटा करले रहिट । कार्यक्रममे सुदूरपश्चिम प्रदेशभित्तरके २० ठो संस्थाके पदाधिकारीके उपस्थिति रहल रहे ।
निजी प्राविधिक शिक्षालय महासंघ निजी क्षेत्रमे संचालित टिएसएलसी तथा डिप्लोमा तहमे शिक्षा डेहे लाग स्थापना करल संस्थाहुकनके संचालकके छाता संगठन हो ।
यी कार्यक्रमसे महासंघहे क्रियाशिल, संस्थाके हकहितमे बोल्ना सक्कु संघसंस्थाहे प्रगतिके डगरमे डो¥याइक लाग नयाँ समिति गठन करल बा ।
नयाँ समिति किशोरकुमार पाण्डे अध्यक्षतामे गठन हुइल बा । अस्टेके उपाध्यक्षमे ललितानन्द जोशी, सचिवमे सुजितराज शर्मा, कोषाध्यक्षमे नरेश बिष्ट चयन हुइल बाटै कलेसे सदस्यमे माधव जोशी, चुडामणि शर्मा, पदमराज नेपाली चयन हुइल बाटै ।
कार्यक्रमके संचालन सुदूरपश्चिम पोलिटेक्निई ईन्स्टिच्यूटके प्रबन्ध निर्देशक सुजित शर्मा करले रहिट कलेसे शुभकामना ललितानन्द जोशी डेलै ।
