काँग्रेस नेतृ डा. आरजुसे ३३ लाखके स्वास्थ सामग्री सहयोग
पहुरा समाचारदाता
धनगढी, ३० असार । नेपाली काँग्रेसके नेतृ, सुरक्षित मातृत्व संजाल महासंघके केन्द्रीय अध्यक्ष एवं वरिष्ठ सामाजिक अभियन्ता डा. आरजु राणा देउवा सुदूरपश्चिममे ३३ लाख बराबरके कोरोना स्वास्थ्य सुरक्षा सामग्री हस्तान्तरण करले बाटी ।
सुदूरपश्चिमके जनताहे कोरोना भाईरसके संक्रमणसे बचाइक लाग टमान समयमे सदूरपश्चिमके ९ जिल्लाके जिल्ला अस्पताल ओ स्वास्थ्य केन्द्रमे रहल ५७ ठो प्रसूति गृहहे ३३ लाख बराबरके स्वास्थ्य सामग्री सहयोग करल हुइट ।
कोरोना भाईरसके संक्रमणसे बचैना ओ प्रसूति गृहमे रहल गर्भवती ओ सुत्केरी महिला एवं नवजात शिशुके स्वास्थ्यहे मध्येनजर करटी स्वास्थ्य सुरक्षामे विशेष सहयोग पुगे कना उद्देश्यसे उ स्वास्थ्य सामग्री हस्तान्तरण करल काँग्रेस नेतृ एवं संजालके अध्यक्ष डा. आरजु राणा देउवा बटैलै । उहाँ कहलै स्वास्थ सामग्रीसे कोरोना भाईरस संक्रमणसे बच्न ओ और जोखिम न्युनिकरणमे प्रसूति गृहमे रहल गर्भवती, सुत्केरी ओ नवजात शिशुहे प्रत्यक्ष टेवा पुगी ।
सुदूरपश्चिम भर हस्तान्तरण कैना स्वास्थ सामग्रीमे पिपिई १६८ सेट, सेनिटाईजर २४९ लिटर , थरमल गन ५७ ठो, पन्जा १४,१०० पिस, पेपर मास्क ११,४०० पिस, एन ९५ मास्क ६४२ पिस, हातधुने साबुन १,५९० ठो, स्यानेटरी प्याड ५,४७२ ठो ओ फिससिल्ड १६८ ठो, बुट ४० ठो ओ सिटामोल ओ मेट्रो ५२०० ठो रहल बा ।
सुदूरपश्चिममे कोरोना संक्रमण ओ स्वास्थ्य सुरक्षा संवेदनशीलताहे मध्येनजर करटी डाक्टर आरजुसे सुदूरपश्चिममे स्वास्थ्य सामग्री ओ सुत्केरीहे पोषणयुक्त खाद्य सामग्री, क्वारेन्टीनमे रहल मनैनहे हाईजेनिक किट सामग्री निरन्तर प्रदान करटी आइल बाटी ।
