कैलारी गापामे भदौ १ गतेसे विद्यालय सञ्चालनके तयारी

पहुरा समाचारदाता
हसलिया, ३१ असार । कैलारी गाउँपालिका विद्यालय सञ्चालनके लाग तयारीमे जुटल बा ।

विश्वभर फैलल कोरोना भाइरस (कोभिड–१९) के कारण गैल चैत ११ गतेसे बन्द हुइल विद्यालय सञ्चालनके लाग तयारीमे जुटल कैलारी गाउँपालिकाके शिक्षा शाखा जनैले बा । कोरोना भाइरसके कारण बनल जटिल परिस्थिति सामान्य हुइटी गैलपाछे विद्यार्थीनके पह्रे पैना अधिकार सुनिश्चित करेक लाग सक्कु प्रक्रिया पुगाके विद्यालय सञ्चालन कैना तयारीमे जुटल शिक्षा शाखा प्रमुख गणेश मिश्र बटैलै ।

उहाँ कहलै, विद्यालय सञ्चालन करेक लाग विद्यालयके प्रअ, विद्यालय व्यवस्थापन समितिबीच छलफल कैगिल बा, पहिल चरणमे साउन १ गतेसे विद्यालयके शिक्षकहुकन विद्यालय जाके कार्ययोजना बनैना कहिके निर्णय हुइल बा ।’ गाँपालिका भिटर सक्कु विद्यालयसे सावन १० गतेभिटर कार्ययोजना पठैलेसे गाउँपालिकासे निर्देशिका जारी कैना शाखा अधिकृत मिश्र कहलै ।

कोरोना भाइरस (कोभिड–१९) के महामारी फैललसंगे देशभरके सामुदायिक विद्यालयमे क्वारेन्टाइन ओ आइसोलेशन बनागिल बा । ‘कैलारी गाउँपालिकाके सामुदायिक विद्यालयमे बनल क्वारेन्टाइन करिब खाली हुसेकल ओरसे सरसफाईके काम हुइटी रहल ओ सरसफाईके सक्कु काम हुइलपाछे विद्यालय संचालनमे सहजता हुइना मिश्र बटैलै ।

कैलारी गाउँपालिका अध्यक्ष लाजुराम चौधरी ‘कोभिड–१९ रोकथाम तथा नियन्त्रणमे विद्यालय संचालन निर्देशिका २०७७’ जारी करटी रहल बटैलै । विद्यालयमे क्वारेन्टाइन बनाइल कारण अभिभावकमे परल नइमजा मनोविज्ञानहे अब्बे बुझजैटी रहल उहाँ कहलै । ‘विद्यालयमे बनाइल क्वारेन्टाइन खाली हुइटी रहल ओरसे चर्पीहे सेफटी टयांकीसे सरसफाई कैना, विद्यालयमे सेनिटाइजर छिटना कैना काम हुइटी बा,’ अध्यक्ष चौधरी कहलै,’ अभिभावकहुकनमे परल नइमजा मनोविज्ञानहे हटाइक लाग विद्यालयमे पूर्ण रुपमे सरसफाई करके रंगरोगन समेट कैजाई ।’

सावन १ गतेसे शिक्षकहुकन केल विद्यालय जैना कहल बा, निर्देशिक जारी हुइलपाछे सक्कु प्रक्रिया पुगाके भदौ १ गतेसे विद्यार्थीनहेफे बोलैना तयारी हुइटी रहल उहाँ कहलै । निर्देशिकामे विद्यार्थीन कटरा दुरीमे रख्ना, कौन समयमे पह्रैना, मास्क, सेनिटाजरके व्यवस्था लगायत समेटना अध्यक्ष कहलै ।

कैलारी गाउँपालिकाके योजना शाखा प्रमुख तथा क्वारेन्टाइन व्यवस्थापन संयोजक सन्तोषकुमार चौधरी १९ ठो विद्यालयमे क्वारेन्टाइन ओ आइसोलेशन बनाइल बटैलै । उहाँ कहलै, १९ ठो विद्यालयमे बनाइल क्वारेन्टाइन ओ आइसोलेशन करिब खाली हुसेकल बा । वडा नम्बर १ हसुलियाके दीपेन्द्र माविके क्वारेन्टाइनमे २७ ओ वडा नम्बर ५ बैजपुरस्थित सर्वोदय आधारभूत विद्यालयमे बनाइकल क्वारेन्टाइनमे ४ जाने केल रहल उहाँ कहलै ।

कैलारी गाउँपालिकाके टमान वडाके सङ्क्रमण पुष्टि हुइल २८ जाने मन्से २७ जे कोरोना जिटके घर लौटसेकल ओ एक जानेक भर धनगढीके कोरोना अस्पतालमे उपचार हुइटी रहल संयोजक चौधरी बटैलै । बाँकी क्वारेन्टाइनमे रहल व्यक्तिनके पीसीआर परीक्षणके लाग स्वाब संकलन करके पठाइल उहाँ कहलै ।

क्वारेन्टाइन खाली हुइल विद्यालय मन्से सामान ओसरपसार ओ सरसफाई कैना काम हुइटी रहल संयोजक कहलै । सक्कु काम पुरा हुइलेसे विद्यालय संचालन कैना सहजुल हुइना उहाँ बटैलै ।

#Education
#School
#KailariGapa
#CoronaVirus
#PublicHealth
#COVIDー19
#MotherHealth
#Pandemics
#विद्यालय