क्षेत्रीय शहरी विकास आयोजनाके काम सुरु
पहुरा समाचारदाता
धनगढी, ५ सावन । क्षेत्रीय शहरी विकास आयोजना अन्तर्गत धनगढीमे सडक निर्माणके ठेक्का पाइल निर्माण कम्पनीसे कालिका कन्ट्रक्सनसे प्रारम्भिक चरणके काम सुरु करले बा ।
कालिका कन्ट्रक्सनके प्रतिनिधी प्रकाशचन्द्र खरेलके अनुसार चौराहासे कैलाली नाला समके सर्भेके काम पुरा हुइल जनाइल बा । ओस्टके गुल्म–चर्च सडकके सर्भे अन्तिम चरणमे पुगल बा कलेसे शहिद गेटसे क्याम्पस रोड सडके ३ दशमलव ५ किलो मिटर मध्य २ दशमलव ५ किलोमिटर सर्भेके काम पुरा हुइल जनाइल बा ।
क्षेत्रीय शहरी विकास आयोजनाके प्रमुख परिक्षित कडरीया ओ कालिका कन्ट्रक्सनके प्रतिनिधी प्रकाशचन्द्र खरेल गत असार २८ गते सम्झौता पत्रमे हस्ताक्षर करल रहिट । सम्झौता पत्रमे निर्माण कम्पनीसे निर्माणके काम २१ दिन भित्रे सुरु कैना ओ दुई बरस भित्रे निर्माण सम्पन्न कैना उल्लेख करल बा ।
एसियाली विकास वैंकके सहयोगमे संचालन हुइल आयोजना अन्तरगतके औरे काम सुरु हुइलेसे फेन सडक ओ नाली निर्माणके काम आघे बह्रे सेकल नाइ रहे ।
क्षेत्रीय सहरी विकास आयोजना अन्तर्गत पहिल चरणमे ७ ठो सडक निर्माण हुइना सम्झौतामे रहल बा । पहिल चरणमे गुल्म–चर्च रोड (२ हजार ७ मिटर), धनगढी मेन रोड, ट्राफिक चौराहासे–कैलाली नाला (१ हजार ३ सय ८० मिटर), हुलाकी सडक–क्याम्पस रोड – जाखोरताल (७ सय मिटर), क्याम्पस रोड–चटकपुर (३ हजार ६ सय ५० मिटर), धनगढी– खुटीया स्याउले रोड (८ सय ७० मिटर), मालपोत रोड (४ सय ३० मिटर ओ हसनपुर रोड (१ हजार १ सय ५० मिटर) रहल बा ।
निर्धारित समयमे नै काम सम्पन्न हुइना मेरके काम आघे बह्रल बा, नगरप्रमुख वड कहलै, यकर लाग आम नगरवासीके सहयोग आवश्यक पर्ना डेखजाइठ् । बरवार आयोजना हम्रे पैले बाटी नगरप्रमुख वड कहलै, पहिल चरणके काम पुरा हुइलेसे दुसरा चरणके काम सुरु हुइ ।
