रानाथारु सामुदायिक भवनके उद्घाटन

पहुरा समाचारदाता
धनगढी, ४ सावन । कैलालीके धनगढी उपमहानगरपालिका वडा नम्बर ८ स्थित धनगढी गाउँमे रानाथारु सामुदायिक भवनके उद्घाटन हुइल बा ।

संघीय सरकारके सात लाख ओ प्रदेश सरकारके १५ लाख करके २२ लाख रुप्या लागतमे बनल नवनिर्मित सामुदायिक भवनके उदघाटन प्रदेशसभा सदस्य मालामति राना करले रहिट । कार्यक्रमके वकडा पहुना रहल प्रदेशसभा सदस्य सामुदायिक भवन उदघाटनके क्रममे बोल्टी अपन विगतके सपना सकार हुइल बटैली । सामुदायिक भवन निर्माणके लाग बजेट विनियोजना गर्न कडा सषर्घ करे परल उहाँ बटैली ।

‘गाउँ समुदायमे समय–समयमे हुइना बैठक, मुद्दा मामिला मिलाइक लाग अलग्गे सामुदायिक भवन नइहुके सास्ती खेपे परे,’ प्रदेशसभा सदस्य मालामति कहली–‘ अलग्गे सामुदायिक भवन बनलपाछे बैठक, कचहरी, मुद्दा मामिलाके लाग छलफल कैना सहजुल हुइल बा ।’ उ रानाथारु समुदायिक भवनमे सांस्कृकित कार्यक्रम तथा कार्यक्रम चलाइक लाग भाडामे समेत डेहे सेक्ना बटैली ।

धनगढी उपमहानगरपालिका वडा नम्बर ८ के अध्यक्ष नारायण प्रसाद बराल रानाथारु सामुदायिक भवन बनैना सह्रनिय कार्य रहल बटैलै । एक तल्ला बनल उ सामुदायिक भवन अब्बेफे निर्माणाधिन अवस्थामे रहल ओरसे अइना आर्थिक बर्षमे वडा कार्यालयसेफे बजेट विनियोजन कैना प्रतिवद्धता जनैलै । यी सामुदायिक भवन वडा नम्बर ८ मे रहल ओरसे यकर सम्भार ओ संरक्षण कैना सक्कु वडाबासीके दात्यि रहल बटैलै । धनगढी वडा नम्बर ८ मे वडाके सबसे ढेर बजेट आइल ओरसे यहाँक विकासमे सक्कुहुनके सहयोग कैना अध्यक्ष बराल आग्रह करलै ।

रानाथारु सामुदायिक भवन उदघाटन कार्यक्रममे वडा सदय रामस्वरुप राना, पूर्व वडा अध्यक्ष लालमणि राना, धनगढी माविके पूर्व विद्यालय व्यवस्थापन समिति अध्यक्ष शिवराज राना, पूर्व भल्मन्सा सन्तराम राना, रानाथारु समाजके केन्द्रीय कोषाध्यक्ष कन्दकला राना लगायत मन्तव्य व्यक्त करले रहिट ।

रानाथारु सामुदायिक भवन उदघाटन कार्यक्रम धनगढी गाउँके भल्मन्सा भज्जी रानाके अध्यक्षतामे हुइल रहे कलेसे राना थारु सामुदायिक भवन मर्मत उपभोक्ता समितिके अध्यक्ष प्यारेलाल राना स्वागत मन्तव्य तथा भवन निर्माणबारे जानकारी करैले रहिट । कार्यक्रमके संचालन गोविन्दराज राना करले रहिट । उ भवनके लाग प्रदेश सरकारके लालकिताव थप १० लाख रुपियाके बजेट विनियोजना करल बा ।