थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ अगहन २६४६, मंगर ]
[ वि.सं १३ मंसिर २०७९, मंगलवार ]
[ 29 Nov 2022, Tuesday ]

सुदूरपश्चिममे कोरोनाके ३२ जाने संक्रमित ठप्लै

पहुरा | ६ श्रावण २०७७, मंगलवार
सुदूरपश्चिममे कोरोनाके ३२ जाने संक्रमित ठप्लै

पहुरा समाचारदाता
धनगढी, ६ सावन ।
सुदूरपश्चिम प्रदेशमे मंगरके रोज ३२ जाने कोरोना संक्रमित ठपल बाटै । पछिल्का २४ घण्टामे हुइल टमान ठाउँक परिक्षणके क्रममे ३२ जाने संक्रमिट ठपल हुइट । सेती प्रादेशिक अस्पतालमे २७, डडेल्धुरा अस्पतालमे ४ ओ त्रिभुवन विश्वविद्यालय काठमाण्डौंमे १ करके ३२ जनहनमे कोरोना संक्रमण पुष्टि हुइल हो ।

सेती प्रादेशिक अस्पतालके प्रयोगशालामे हुइल परिक्षणमे कैलालीके ३ जाने, कञ्चनपुरके २० ओ बझांङके ४ जाने करके २७ जनहनमे कोरोना संक्रमण पुष्टि हुइल सेती प्रादेशिक अस्पतालके सूचना अधिकारी दिलिपकुमार श्रेष्ठ जानकारी डेलै । संक्रमितमे कैलाली जिल्ला गोदावरी नगरपालिका वडा न. ११ के २४ बर्षिया महिला, १ बर्षिय बालक ओ ३१ बर्षिय पुरुष सहित ३ जाने रहल बाटै । ओस्टेक कञ्चनपुर जिल्ला बेदकोट नगरपालिकामे ४ महिला ओ ५ बर्षिय बालक सहित ७ जाने करके ११ जाने, कञ्चनपुर शुक्लाफाटामे १ महिला, ५ पुरुष करके ६ जाने, कञ्चनपुर लालझाडी गाउपालिकाके ३ पुरुषमे कोरोना पुष्टि हुइल अधिकारी श्रेष्ठ बटैलै ।

बझाङ जिल्ला जयपृथ्वी नगरपालिका वडा न ३ के १२ ओ ३८ बर्षिया दुई महिला, १५ बर्षिय एक पुरुष करके ३ जाने, बझाङके छब्बिस पाथिभरा–६ के ३१ बर्षिय एक पुरुष, करके ४ जनहनमे कोरोना संक्रमण पुष्टि हुइल बा ।

डडेल्धुरा अस्पतालमे करल कोरोना परीक्षणमे डोटीके ४ जनहनमे ओ त्रिभुवन विश्वबिद्यालय काठमाण्डौंमे करल परीक्षणमे कैलालीके १ जनहनमे कोरोना संक्रमण पुष्टि हुइल स्वास्थ्य तथा जनसंख्या मन्त्रालयके प्रवक्ता डा. जागेश्वर गौतम दैनिक मिडिया विफ्रिङ मार्फत जानकारी डेलै ।
ओस्टेक मंगरके रोज देशभरमे ठप १५० जनहनमे कोरोना संक्रमण विल्गाइल बा । स्वास्थ्य तथा जनसंख्या मन्त्रालयके अनुसार मंगरसम कोरोना भाइरस संक्रमितके संख्या १७ हजार ९९४ पुगल बा । ओस्टेक मंगरके रोज ६०९ जाने डिस्चार्ज हुइल बाटै । डिस्चार्ज हुइलके संख्या हालसम १२ हजार ४७७ पुगल बा ।

अब्बे देशभरके टमान आईसोलेसनमे ५ हजार ४ सय ७७ जाने संक्रमित उपचाररत रहल बाटै । प्रदेश नम्बर १ मे १ सय ८, प्रदेश नम्बर २ मे १ हजार ९ सय १३, बागमती प्रदेशमे ४ सय २१ ओ गण्डकी प्रदेशमे ३ सय ८० जाने संक्रमित उपचाररत रहल बाटै ।

ओस्टेक प्रदेश नम्बर ५ मे ३ सय ७०, कर्णाली प्रदेशमे २ सय ९३ ओ सुदूरपश्चिम प्रदेशमे १ हजार ९ सय ९२ जाने संक्रमित उपचाररत रहल बाटै । क्वारेन्टिनमे २१ हजार ७ सय ४ जाने रहल बाटै । पीसीआर विधिसे मंगलबार ३ हजार ९ सय ६३ जनेक कोरोना परीक्षण हुइल बा ।

ओस्टेक हालसम ७ जिल्ला कोरोनाभाइरस संक्रमणमुक्त रहल बा । जेम्ने भोजपुर पाँचथर, संखुवासभा धनकुटा, रसुवा, मनाङ ओ मुस्ताङ जिल्ला रहल बाटै ।

जनाअवजको टिप्पणीहरू