सुदूरपश्चिममे फेन सावन ८ गतेसे सार्वजनिक यातायात सञ्चालन कर्ना तयारी

पहुरा समाचारदाता
धनगढी, ६ सावन । सुदूरपश्चिम प्रदेशमे फेन सावन ८ गतेसे सार्वजनिक यातायात सञ्चालन कर्र्ना तयारी हुइल बा । केन्द्रमे नेपाल यातायात व्यवसायी राष्ट्रिय महासंघ ओ यातायात मजदुरहुकनके ट्रेड युनियन संयुक्त पत्रकार सम्मेलन करके सावन ८ गतेसे सार्वजनिक यातायात सञ्चालन कर्ना घोषणा करल संगे सुदूरपश्चिममे फेन तयारी करगिल हो ।

सुदूरपश्चिममे रहल सक्कु यातायात प्रालिबिच यातायात सञ्चालनके विषयमे छलफल हुइटी रहल सुन्दर सुदूरपश्चिम यातायात प्रालिके अध्यक्ष पदम सापकोटा बटैलै ।

यातायात व्यवस्था विभागसंग ५०÷५० प्रतिशत शुल्क सरकार ओ व्यवसायी बेहोर्न गरी मजदुरहुकनके कोरोना बीमा कर्र्ना, सरकारसंग कौनो मजदुरके ज्यान गैलेसे क्षतिपूर्ति डेना मेरके कोष बनैना अनुरोध कर्र्ना लगायतके सहमति हुइल महासंघ जनैले बा ।

सरकार असार २६ गतेसे काठमाडौं उपत्यकाभिट्टर ओ औरे ठाउँमे सम्बन्धित जिल्लाभिट्टर सार्वजनिक यातायात सञ्चालन कर्र्ना निर्णय करल रहे । मने सुदूरपश्चिमके अधिकासं व्यवसायी टमान माग राख्टी यातायात सञ्चालन कर्नामे आनाकानी करल रहिट ।