थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १९ अगहन २६४६, सोम्मार ]
[ वि.सं १९ मंसिर २०७९, सोमबार ]
[ 05 Dec 2022, Monday ]

पीसीआर मेसिन स्थापनाके लाग १० लाख सहयोग

पहुरा | ६ श्रावण २०७७, मंगलवार
पीसीआर मेसिन स्थापनाके लाग १० लाख सहयोग

पहुरा समाचारदाता
धनगढी, ६ सावन ।
डडेल्धुरामे पीसीआर मेसिन स्थापनाके लाग सुदूर पश्चिम समाज दक्षिण कोरियासे १० लाख रुपैया सहयोग करले बा ।

ह्युमानिटी फाउण्डेसन नेपाल ओ सुदूरपश्चिम समाज अमेरिकाके अगुवाईमे सुदूर पश्चिमके सात पहाडी जिल्लाके कोरोना परीक्षणके लाग डडेल्धुरा अस्पताल डडेल्धुरामे स्थापना करल पीसीआर मेसिनके लाग सुदूरपश्चिम समाज दक्षिण कोरिया १० लाख रुपैया सहयोग करल हो ।

मंगरके धनगढीमे आयोजित पत्रकार सम्मेलनमे सुदूरपश्चिम समाज दक्षिण कोरियाके ओरसे कोरियामे संकलित १० लाख रुपैयाके चेक समाजके कोषाध्यक्ष डिल्लीराज पनेरु ह्युमानिटी फाउण्डेसनके उपाध्यक्ष पुष्कर ओझाहे हस्तान्तरण करल रहिट । उपाध्यक्ष ओझा डडेल्धुरामे पीसीआर मेसिन स्थापनाके लाग सुदूरपश्चिम समाज कोरियासे हुइल सहयोग ओ सहकार्यके उच्च प्रशंसा करलै ।

उहाँ पीसीआर स्थापनाके लाग किल नाइ होके सुदूरपश्चिममे विपत्ति ओ समस्यामे सुदूरपश्चिम समाज दक्षिण कोरियासे करल सहयोग अत्यन्त प्रशंसनीय रहल बटैलै । कार्यक्रममे समाजके कोषाध्यक्ष पनेरु ह्युमानिटी फाउण्डेसन ओ सुदूरपश्चिम समाज अमेरिकासे डडेल्धुरामे पीसीआर स्थापनाके लाग खेलल् भूमिकाके प्रशंसा करलै ।

उहाँ समाजसे सुदूरपश्चिम विपत्ति तथा समस्यामे राहत तथा सहयोग प्रदान कैनाके साथे आर्थिक अभावमे उपचारसे बञ्चित व्यक्तिहुुक्रनहे समेत सहयोग करल जानकारी डेलै ।

कार्यक्रममे कैलाली उद्योग वाणिज्य संघके सचिव सिद्धराज पनेरु डडेल्धुरामे पीसीआर स्थापनाके अभियानमे सहयोग करुइया सक्कु संघसंस्था ओ व्यक्तिहे धन्यवाद डेहल रहिट ।

जनस्तरसे सुरु करल अभियान अत्रा हाली सम्पन्न कैके जनताहे सेवा डेना सफल हुइलमे संघके सचिव पनेरु ह्युमानिटी फाउण्डेसन नेपाल, सुदूर पश्चिम समाज अमेरिका लगायत देश विदेशसे सहयोग करुइया सक्कु जनहनहे धन्यवाद डेहल रहिट ।

कार्यक्रममे फाउण्डेसनके महासचिव दीर्घराज उपाध्याय जनस्तरसे चन्दा संकलन कैके डडेल्धुरामे स्थापना करल पीसीआर मेसिनसे सुदूरपश्चिमके सात पहाडी जिल्लाके बासिन्दाके कोरोना परीक्षणमे सहज हुइल बटैलै ।

उहाँ पीसीआर मेसिन स्थापनाके लाग देश विदेशसे सहयोग करुइया टमान व्यक्ति, व्यवसायी, संघसंस्था, विश्वके टमान मुुलुकमे रहल सुदूरपश्चिमेली अगुवा, सुदूर पश्चिम समाजहे धन्यवाद डेहल रटि । समाजके अध्यक्ष बीरबहादुर पालके अध्यक्षमे बैठल बैठकसे पीसीआर मेसिन स्थापनाके लाग डा. अग्नीराज कोईरालाके नेतृत्वमे आर्थिक सहयोग संकलन समिति गठन करल रहे । उहे समितिसे १० लाख रुपैया संकलन करल रहे । यी रकम सुदूरपश्चिम समाज दक्षिण कोरिया पूर्व प्रतिबद्धता अनुसार मंगरके रोज हस्तान्तरण करल हो ।

समाजके अध्यक्ष पाल, अभियानके संयोजक कोईराला ओ महासचिव ओम साउँद एक विज्ञप्ति जारी करटी आर्थिक सहयोग संकलन अभियानमे सहयोग करुइया सक्कु व्यक्ति तथा संघसंस्थाहे धन्यवाद डेले बाटै । ह्युमानिटी फाउण्डेस ओ सुदूरपश्चिमके अगुवाईमे डडेल्धुरामे जनस्तरसे चन्दा संकलन कैके डडेल्धुरामे पीसीआर मेसिन स्थापना होसेकल बा ।

फाउण्डेसनसे पीसीआर मेसिनके लाग आर्थिक संकलन अभियान पीसीआर मेसिन स्थापनापाछे बन्द करसेकल बा । यद्दपि प्रतिबद्धता अनुसारके रकम भर अइना क्रम जारी रहल फाण्डेसन जनैले बा ।

सुदूरपश्चिम समाज दक्षिण कोरिया लगायत विश्वके टमान मुलुकमे रहल सुदूर पश्चिम समाज, सुदूरपश्चिमेली अगुवाहुक्रनके सहयोग ओ सहभागितामे जनस्तरसे संकलित रकमसे डडेल्धुरामे पीसीआर मेसिन स्थापना करल हो । नेपालमे जनस्तरसे पीसीआर स्थापना करल यी पहिल हो ।

जनाअवजको टिप्पणीहरू