तीन ठो टयाक्टर, काठ सहित ५ जाने पक्राउ

पहुरा समाचारदाता
धनगढी, ८ सावन । जिल्ला प्रहरी कार्यालय कैलालीसे खटल प्रहरीके गस्ती टोली तीन ठो टयाक्टर, काठ सहित ५ जाने पक्राउ करले बा ।

बुधके सकारे पाँच खटल प्रहरी टोली कैलालीके धनगढी उप–महानगरपालिका वडा नं. ६ जालीस्थित करन चौधरीके घर नुकाके धारल अवस्थामे टमान साईजके चिरान करल ९ गोलिया ओ टमान साईजके कडी १२२ थान फेला पारल जिल्ला प्रहरी कार्यालय कैलालीके प्रवक्ता प्रतिक विष्ट जनैलै । उहे क्रममे धनगढी उप–महानगपालिका वडा न ०६ बैठना ३७ के करन चौधरी ओ धनगढी–१७ बैठना बर्ष २० के सुरज चौधरीहे समेत पक्राउ करल उहाँ जनैलै ।

ओस्टेक करके यिहे गैल सोम्मारके रोज दिनके दुई बजे धनगढी उप–महानगरपालिका वडा न ७ देवरियास्थित सडक खण्डमे धनगढी–५ बैठुइया बर्ष ३६ के नरेश चौधरी, बर्ष २८ के बिनु चौधरी, वडा नम्बर ६ बैठुइया बर्ष ३१ के बिर बहादुर चौधरीहे से २ त ७२, से १ त ५३७३ ओ से २ त १८५३ नम्बरके ट्याक्टरमे साल जात जैसिन १९५.८८ क्युफिट काठ लैजैटी रहल अवस्थमे फेला पारल जिल्ला प्रहरी कार्यालय कैलाली जनैले बा । बरामद करल कठुवा ओ मनै आवश्यक कारबाहीके लाग जिल्ला वन कार्यालय कैलालीमे पठाइल प्रहरी जनैले बा ।