सुदूरपश्चिममे आज ३५ जहनमे कोरोना पुष्टि
पहुरा समाचारदाता
धनगढी, ८ सावन । सुदूरपश्चिममे आज थप ३५ जहनमे कोरोना पुष्टि हुइल बा । धनगढीके सेती प्रादेशिक अस्पतालके प्रयोगशालामे ओ डडेल्धुरा प्रयोगशालामे हुइल कोरोना परीक्षणमे थप ३५ जहनमे कोरोना पुष्टि हुइल हो । सेती प्रादेशिक अस्पतालमे करल परीक्षणमे कञ्चनपुरके २६ जहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ बटैलै ।
उहाँक् अनुसार कञ्चनपुरके शुक्लाफाँटा नगरपालिकाके १० पुरुष ओ ३ महिला कैके १३ जाने, बेल्डाँडी गाउँपालिकाके ८ पुरुष ओ बेलौरी नगरपालिकाके ३ पुरुष ओ ४ पुरुष कैके ५ जहनमे संक्रमण पुष्टि हुइल बा । उहाँ पाछेक २४ घण्टामे सेती अस्पतालके प्रयोगशालामे २ सय ५८ जहनके कोरोना परीक्षण करल जानकारी डेलै ।
अस्टेक डडेल्धुरामे करल परीक्षणमे आज ९ जहनमे संक्रमण पुष्टि हुइल स्वास्थ्य तथा जनसंख्या मन्त्रालय जनैले बा । डोटीके ७ ओ डडेल्धुराके २ जहनमे संक्रमण पुष्टि हुइल स्वास्थ्य तथा जनसंख्या मन्त्रालयके प्रवक्ता डाक्टर जागेश्वर गौतम जानकारी डेलै ।
आज ३५ जहनम संक्रमण पुष्टि हुइलपाछे सुदूरपश्चिममे कोरोना संक्रमितके संख्या ४ हजार १ सय ७७ पुगल बा । संक्रमण पुष्टि हुइल २ हजार २ सय ३३ जनने डिस्चार्ज हुइल बाटै कलेसे ८ जहनके मृत्यु हुसेकल बा ।
स्वास्थ्य तथा जनसंख्या मन्त्रालयके अनुसार अब्बेसम सबसे ढेर कैलालीके ९ सय ८५ जहनमे संक्रमण पुष्टि हुइल बा । अस्टेक अछाममे ६ सय ४५, डोटीके ६ सय ४४, बाजुराके ६ सय १६ जहनमे संक्रमण पुष्टि हुइल मन्त्रालय जनैले बा । कञ्चनपुरके ५ सय १३, डडेल्धुराके २ सय ९९, बैतडीके २ सय ७६, बझाङके १ सय ७९ ओ दार्चुलाके २० जहनमे संक्रमण पुष्टि हुइल बा ।
