वडा नम्बर ५ स्मार्ट वडा

पहुरा समाचारदाता
धनगढी, ९ सावन । सूचना प्रविधि स्थापना हुइलपाछे कैलालीके कैलारी गाउँपालिका वडा नम्बर ५ के वडा कार्यालय स्मार्ट बनल बा ।

दुई बरस आघे वडा कार्यालयमे स्थापना हुइल सूचना प्रविधि केन्द्रके डाटा पोर्टलसे टमान मेरिक सूचना तथा सेवा लेहे सेक्ना अवस्था रहल वडाध्यक्ष विष्णु चौधरी बटैलै । वडा कार्यालयमे स्थापना हुइल सामुदायिक सूचना प्रविधि केन्द्रके नियमित सचालन ओ समीक्षा कार्यक्रममे बोल्टी उहाँ सूचना प्रविधि स्थापनासे ढेर सेवा ग्राही घरबैैठे टमान मेरिक सेवा तथा सूचना लेहे सेक्ना हुइल बटैलै ।

सूचना प्रविधि केन्द्रके डाटा पोर्टलसे सेवाग्राहीहुक्रे वस्तुगत विवरण, गाउँपालिकाके नीति, गाउँसभाके निर्णय, वार्षिक विकास कार्यक्रम तथा क्षेत्रगत बजेट, कर तथा उपयोगी जानकारी लेहल वडा अध्यक्ष चौधरी बटैलै । सूचना प्रविधि केन्द्रके डाटा पोर्टलमे सूचना थारु भाषामे रहल ओरसे बहुट सहजुल महशुस करल ओ समयके बचत हुइल बतागिल बा ।

ग्राम विकास तथा अनुसन्धान केन्द्र कैलालीसे सेसी नेपालके आर्थिक सहयोगमे सुशासन परियोजना अन्तर्गत कैलारी गाउँपालिका वडा नम्बर ५ पवेरामे स्थापना करल सामुदायिक सूचना प्रविधिके अवलोकन ५ सय २८ जाने करल अध्यक्ष बटैलै । जेम्ने ३ सय ८८ जाने पुरुष ओ १ सय ४० जाने महिला रहल बाटै । सूचना प्रविधिके अवलोकन संगे टमान मेरिक सूचनासमेट प्राप्त करल उहाँ बटैलै ।

ग्राम विकास तथा अनुसन्धान केन्द्र कैलालीके सुशासन परियोजना जिल्ला संयोजक ठाकुरप्रसाद करियप्रधान सहजीकरण करटी सूचना प्रविधि केन्द्र ओ प्रयोगमे रहल प्रविधि औजारके बारेमे जानकारी डेहल रहिट ।

कार्यक्रममे अधिकारकर्मी गोमा आचार्य, आरडिआरसीके कोषाध्यक्ष भुवन जोशी ओ वडा सचिव चुन्कु चौधरी मन्तव्य तथा जिज्ञासा राखल रहिट । वडा सदस्य, भल्मन्सा, युवा क्लव, शिक्षक, सहकारी, अन्य सरोकारवाला, स्थानीय नागरिक समाज सस्थाके प्रतिनिधिहुकनके सहभागितामे हुइल समीक्षा कार्यक्रममे प्रभाकारी सूचना प्रविधि संचालनके लाग कार्य योजना तयार कैगिल बा ।