परियोजना समन्वयात्मक बैठक

पहुरा समाचारदाता
मसुरिया, १० सावन । बजारमे आधारित प्राविधिक तथा व्यवसायिक सीप प्रवद्र्धन परियोजनाके समन्वयात्मक कार्यक्रम शुकके गौरीगंगा नगरपालिकामे हुइल बा । निड्स नेपालके आयोजनामे हुइल कार्यक्रममे संस्थाके प्रतिनिधि विनोद कडारा परियोजनाके लक्ष्य उद्देश्य ओ समावेश कैना क्षेत्रके बारेमे जानकारी डेहल रहिट ।

परियोजनासे विदेशमे रोजगार गुमाके स्वदेश लौटल ओ स्थानीय वेरोजगार युवाहे बजार मागमे आधारित कृषिमे स्वरोजगार कार्यक्रम संचालन कैना बा ।

युरोपियन युनियन ओ ब्रिटिश काउन्सिलके साझेदारीमे संचालन हुइना परियोजना गौरीगंगामे ४० जाने युवाहे कृषि (आईपीएम) तालिम, प्राविधिक ओ उत्पादनके बजारीकरणमे सहयोग कैना कहले बा ।

निड्स नेपालके अध्यक्ष अञ्जु जोशी भट्टके अध्यक्षतामे हुइल कार्यक्रममे गौरीगंगा नगरपालिका उप–प्रमुख अंचला चौधरी युवाहे देशभिटर रोजगारीके अवसरके सृजना कैना संघ संस्थाके योजनामे नगरपालिकाके सहभागिता, समन्वय ओ साझेदारी रहना प्रतिवद्धता व्यक्त करल रहिट ।