प्रदेश गौरवके सडक आयोजनाके निर्माण सुरु

पहुरा समाचारदाता
धनगढी, १२ सावन । सुदूरपश्चिम प्रदेश सरकारसे छनोट करल प्रदेश गौरवके सडक आयोजना निर्माणके काम आघे बह्राइल बा । सर्भे ओ विस्तृत परियोजना प्रतिवेदन (डिपिआर) के काम पूरा होसेकल प्रदेश गौरवके सडक आयोजना अन्तर्गतके सडकखण्डमे निर्माण कार्य शुरु करल हो ।

प्रदेशके समग्र भौतिक विकासके मेरुदण्डके रुपमे लेहल प्रदेशके गौरवके सडक आयोजना सक्कु नौ जिल्लामे एक एकठो छनोट करल बा । क्षेत्रीय यातायात पूर्वाधार विकास कार्यालय दीपायलके निर्देशक प्रेमदत्त भट्ट पहिले नै डगरा वा ट्र्याक खुलसेकल सडकहे प्रदेशके गौरव सडक आयोजनाके रुपमे छनोट होके निर्माण कार्य आघे बह्रल बटैलै ।

यी सडक आयोजनाके कतिपय ठाउँमे भर लौव ट्र्याक खोले पर्ना डेखल बा । कतिपय सडकके अधिकांश भागमे सर्भे लगायतके काम कैना बाँकी बा । प्रदेश सरकारके चालू आव ०७७/७८ के नीति कार्यक्रममे प्रदेशके गौरवके सडक आयोजनाके निर्माण कार्य तीव्र रुपसे आघे बह्रैना उल्लेख करल बा । गत आव ०७६÷७७ मे यी नौ सडक निर्माणके लाग रु ४२ करोड बजेट विनियोजन करलमे सक्कु बजेट खर्च हुइ नाइ सेकल बटाइल बा ।

निर्देशक भट्ट कहलै “चालू बरस ओ आगामी आर्थिक बरसमे यी सडक पूर्णरुपमे काम हुइ लागल बावै ।” पूर्वाधार विकास कार्यालयमार्फत यी सडकके निर्माणके काम हुइटी रहल बा । डडेलधुराके दैजी लिप्ना हुइटी जोगबुढा सलोन चिकिट्टे, घटाल–ढुङ्गाड हुइटी बझाङसमके सडक तथा डोटीके सहजपुर–बोगटान हुइटी दीपायल समके सडकहे प्रदेश गौरवके आयोजनाके रुपमे छनोट करल बा ।

डोटीमे छनोट हुइल प्रदेश गौरवके सडक आयोजना अन्तर्गतके सहजपुरसे अत्तरकाँडा समके झण्डे ५० किमी सडकखण्डमे सङ्घीय सरकारमार्फत कालोपत्र कैना कार्य हुइटी रहलमे बाँकी खण्डमे प्रदेश गौरवके सडक आयोजनाअन्तर्गत काम हुइ लागल बा ।

पूर्वाधार विकास कार्यालय डडेलधुराके प्रमुख रामचन्द खत्री ठेक्का लागल सडक आगामी तीन बरसभित्रे निर्माण पूरा करसेक्ना लक्ष्य रहल बटैलै । गत वैशाख महिनामे यी आयोजना निर्माणके लाग ठेक्काके प्रक्रिया शुरु कैना योजना रहलमे कोरोना भाइरसके कारण कुछ महिना ढिला शुरु हुइल जनाइल बा ।

प्रदेशके राजधानी जिल्ला कैलालीमे भजनीसे बौनिया हुइटी खिमडीसमके प्रदेशके गौरवके सडक छनोट हुइल बा । चालू बरसमे बौनिया बजारसे उत्तर ओरके झगरपुर क्षेत्रके सडक कालोपत्र करे लागल बा ।

गत आव २०७६/७७ मे प्रदेश गौरवके सडकके कतिपय खण्डमे विस्तृत अध्ययन प्रतिवेदन तयार पर्ना ओ सर्भे कैना लगायतके काम करल रहे । निर्माणके लाग छुट्याइना बजेटके आधारमे आगामी दिनमे सडक निर्माण कार्यके भौतिक प्रगति डेखजैना जिल्ला पूर्वाधार विकास कार्यालय कैलालीके प्रमुख श्याम खड्का बटैलै ।

बझाङके पातिहल्लासे जडार, पानकोट, तल्कोट साइपाल हुइटी हुम्ला जोड्न सडक, अछाम जिल्लाके जङ्गलघाटसे कमलबजार, जयगढ हुइटी बडिमालिका समके सडक, बाजुराके खप्तडसे सिङ्गटन, गैरीकाँटा, आँटीचौर हुइटी मार्तडी समके सडक ओ बैतडीके सतबाँझ, श्रीभावरहाट हुइटी दार्चुला समके सडकहे प्रदेश गौरवके आयोजनाके रुपमे छनोट करल बा ।

बैतडीमे निर्माण हुइ लागल प्रदेश गौरव सडक आयोजना निर्माण कार्यके भौतिक पूर्वाधार विकासमन्त्री पठानसिंह बोहरा भर्खरे शुभारम्भ करल रहिट । बैतडीमे चालू बरसमे १६ किमी सडक निर्माण तथा स्तरोन्नति करे लागल बा ।

दार्चुलामे छनोट करल खलङ्गासे खार, बेथला, पारिवगर हुइटी अपी हिमाल गाउँपालिकाके खण्डेश्वरी समके प्रदेश गौरवके सडकमध्ये चालू बरसमे १९ किलोमिटर कालोपत्र कैना लक्ष्य रहल बा । कञ्चनपुरके बेलौरीसे कलुवापुरसमके खण्डमे चालू बरसमे निर्माण तथा स्तरोन्नतिके काम करे लागल बा । कञ्चनपुरमे बेलौरीसे कलुवापुर, नायल हुइटी बुडर समके सडकहे प्रदेश गौरवके सडकमे छनोट करल बा ।