थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ सावन २६४६, अत्वार ]
[ वि.सं २९ श्रावण २०७९, आईतवार ]
[ 14 Aug 2022, Sunday ]
‘ लकडाउनके अवधिमेफे मानव अधिकार उलंघनके घटनामे कमि नइआइल ’

३ महिनामे ११ सय ९१ जाने पीडित

पहुरा | १२ श्रावण २०७७, सोमबार
३ महिनामे ११ सय ९१ जाने पीडित

पहुरा समाचारदाता
धनगढी,१२ सावन ।
अनौपचरिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय लकडाउनके अवधिमे मानव अधिकार उलंघनके घटनामे कमि नइआइल बटैले बा ।

‘सुदूरपश्चिममे मानव अधिकारके अवस्था तथा कोरोना भाइरसके कारण मानव अधिकार रक्षकहुकनमे पारल असरबारे’ सोम्मारके रोज धनगढीमे कैगिल छलफल कार्यक्रममे मानवअधिकार उलंघनके घटनामे कमी नइआइल बटागिल रहे । लकडाउनके अवधिमे तीन महिनामे ११ सय ९९ सय जाने टमान पक्षसे प्रत्यक्ष रुपमे पीडित हुइल इन्सेक सुदूरपश्चिम प्रदेश संयोजक खडकराज जोशी बटैलै ।

उहाँ कहलै, ‘सवारी दुर्घटनामे कमी डेखलेसेफे लकडाउनके समयमे घरेलु हिंसा, लैङिक हिंसा घटना तथ्याङकमे बह्रल विल्गाइल ।’ सक्कुओर कोरोना भाइरसके संन्त्रास फैलल बेला रातदिन खटना ४० जाने स्वास्थ्यकर्मी पीडिट हुइल संयोजक जोशी कहलै । सुदूरपश्चिममे केल ३ जाने स्वास्थ्यकर्मी पीडित हुइल उहाँ जनैलै । जनताहुकन सन्देश पुगुइया संचारकर्मी, जनताके सुरक्षामे खटल सुरक्षाकर्मी समेट प्राभवित हुइल उहाँ बटैलै ।

गैर सरकारी संस्था महासंघके केन्द्रीय सदस्य सावित्रा घिमिरे क्वारेन्टाइनमे बैठल सुत्केरी महिलाहुक्रे सबसे ढेर सास्ती भोगे परल बटैली । महिलाहुकनहे वितरण करल राहत पोषणयुक्त नइहुके खाली नाउँमात्रके रहल उहाँक आरोप लगैली । कोरोना भाइरस कौनो जाती, गरिब धनीहे भेदभाव नइकरल मने टमान क्वारेन्टाइनमे बैठुइया दलित समुदायके व्यक्तिहुनक जातीय विभेद हुइल केन्द्रीय सदस्य घिमिरे बटैली । और देशसे लौटके आइल बैतडी ओ गुल्मीके क्वारेन्टाइनमे बैठुइयाहे दलित समुदायके व्यक्तिनहे जातीय विभेद हुइल उहाँ जनैली ।

गैर सरकारी संस्था महासंघ सुदूरपश्चिम संयोजक देवी खनाल कोरोना भाइरसके कारण दिर्घरागीहुक्रे उपचार नइपाके अकालमे ज्यान गुमाइल बटैलै । कोरोना भाइरसके कारण सरकारी अस्पतालमे सेवा सुविधा लेहे नइसेक्ना अवस्था रहल उहाँ जनैलै ।

नेपाल पत्रकार महासंघ प्रदेश अध्यक्ष अर्जुन शाह कोरोना भाइरसके कारण स्वदेश लौटुइया घरपरिवारमे अब्बे भोकमारीके अवस्था आइल बटैलै । पहिले गाउँ घरके साहु चाउर पैसा डेलेसेफे अब्बेभर नइडेहल ओरसे ढेर परिवार भोखभुखे बैठना अवस्था रहल उहाँ बटैलै । भोकसे रोग भारी नरहल कहटी कुछ समुह फेरसे भारतमे रोजगारीके लाग जैना तयार हुइटी रहल उहाँ कहलै ।
अध्यक्ष शाह कहलै, ‘कोरोनाके कारण संचारक्षेत्रमे प्रत्यक्ष असर परल बा, टमान संचारगृह बन्द हुइना अवस्था आइटा, ढेर संचारकर्मी वेरोजगार समेट हुइल बटै ।’

नेपार बार एशोसियशन इकाई अध्यक्ष शिवराज केसी लकडाउनके अवधिमे वितरण करल राहत गुणस्तरहिन रहल बटैलै । राहतके नाउँमे ढेर स्थानीय तहकसे सरल, गुणस्तरहिन चाउर बाटल पाइल उहाा बटैलै । अध्यक्ष केसी कहलै, कोरोना भाइरसके कारण दैनिक ज्याला मजदुरी करके खउइया ढेर प्रभावित हुइल बटैलै । राहत वितरणमे अनियमितता समेट हुइल उहाँ कहलै ।

राष्ट्रिय मानव अधिकार सुदूरपश्चिम संयोजक झंकर रावल लकडाउनके अवधिमे मानव उलंघनके घटना ढेर हुइल मने पीडित न्यायके ढोकासम पुगे नइसेकल बटैलै । कार्यक्रममे इन्सेक प्रलेख अधिकृत कृष्ण विक, धनगढी एफएमके प्रबन्धक हरि जोशी लगायत लकडाउनके अवधिके सक्कु क्षेत्र प्रभावित हुइल बटैले रहिट ।

जनाअवजको टिप्पणीहरू