हमार जनप्रतिनिधि खै ? निर्दाेष हुइट कलेसे रिहा करो

पहुरा समाचारदाता
धनगढी, १३ सावन । कैलालीके क्षेत्र नं. १ जनप्रतिनिधि विहिन हुइल कहटी टीकापुरमे युवाहुक्रे आन्दोलन सुरू करले बाटै ।

सोम्मारके स्वतन्त्र युवा समूहसे आयोजित र्याली तथा कोण सभामे टीकापुरके युवाहरु स्वस्फुर्त सहभागि हुइल रहिट । बसपार्कसे सुुरु हुइल र्याली खडक चोकमे पुगके कोण सभामे परिणत हुइल रहे । र्यालीमे युवाहुक्रे हमार जनप्रतिनिधी खै ?, जनप्रतिनिधी विहिन बनाइ नाइ मिली, टीकापुरके विकास खै ?, निर्दाेष रलेसे रिहा करो, कि उप निर्वाचन कराउ लगायत लिखल प्लेकार्ड सहित नारा लगाइल रहिट ।

ओस्टके कोण सभामे क्षेत्र नं. १ विगत तिन बरससे जनप्रतिनिधी विहिन रहल मने सम्बन्धित निकाय कौनो चासो नाइ डेखाइल ओरसे युवाहुक्रे सडकमे आइ परल बटैले बाटै । सभाहे सम्बोधन करटी युवा गणेश वली कहलै–‘कैलाली क्षेत्र नं. १ के सांसद रेशम चौधरी जेलमे बाटै । मने राज्य न उपनिर्वाचन करल,न ओहकान रिहाइ । पार्टी ओ नेता आपन सहजता हेरटी चुपचाप बाटै मने जनताहे जनप्रतिनिधी विहिन बनैले बा ।’

सभाहे सम्बोधन करटी औरे युवा लोक बहादुर बुढा कहलै–‘सांसद नाइ होके विकासमे बाधा हुइल, टीकापुरके समस्या सांसदमे के सुनाइ ? निर्वाचित सांसद जेलमे बाटै, उप निर्वाचन करे पर्ना रहे या दोषी नाइ हुइट कलेसे आपन क्षेत्रमे काम करक लाग रिहा कैना रहे ।’

ओस्टके औरे युवा अनुज हमाल आब युवा नै अग्रसर नाइ हुइटस टीकापुरमे विकास नाइ हुइना बटैलै । राजनीतिकर्मी, व्यापारी लगायत टीकापुरके विकास ओ जनताके अधिकारके लाग चासो नाइ डेहल उहाँहुक्रे गुनासो करल रहिट ।

अधिकारके खोजी कैना सुरूवात रहल ओ अस्टके बाँकी बरस फेन बित्ना स्थिति अइलेसे कडा आन्दोलन कैना युवाहुक्रे चेतावनी डेले बाटै । साथे सम्पुर्ण क्षेत्र नं. १ के जनता, व्यापारी, राजनैतिक दल, बुद्धीजिवीहे फेन यी विषयमे अग्रसर हुइना अनुरोध करले बाटै ।

प्रतिनिधि सभा निर्वाचनमे कैलाली क्षेत्र नम्बर १ से रेशम चौधरी निर्वाचित हुइलर हिट । उहाँ वारेसमार्फत प्रतिनिधि सभा निर्वाचनमे उम्मेद्वारी डेहल रहिट । फरार रहल अवस्थामे राजपासे कैलाली १ मे प्रतिनिधिसभा सदस्यके उम्मेदवार बनल उहाँ भारी मतान्तरसे विजयी हुइल रहिट ।
सांसद चौधरी एमालेके उम्मेदवार मदनकुमारी शाहहे २०९३५ मत अन्तरसे पराजित करल रहिट । सांसद चौधरी ३४३४१ मत प्राप्त करल रहिट कलेसे शाह १३४०६ मत प्राप्त करल रहिट ।

थरुहट÷थारुवान ओ अखण्ड सुदूरपश्चिम आन्दोलनके क्रममे २०७२ भदौ ७ गते टीकापुरमे झडप हुुइल रहे । ओहे क्रममे ८ प्रहरी ओ १ नाबालकके ज्यान गैल रहे ।

उ घटनामे दोषी रहल अभियोगमे जिल्ला अदालत कैलाली सांसद चौधरीसहित ११ जनहनहे जन्मकैदके फैसला करल रहे ।