परियोजनाके समन्वयात्मक कार्यक्रम

पहुरा समाचारदाता
सुखड, १३ सावन । कैलालीके घोडाघोडी नगरपालिकामे बजारमे आधारित प्राविधिक तथा व्यवसायिक सीप प्रवर्द्वन परियोजनाके समन्वयात्मक कार्यक्रम मंगरके सम्पन्न हुइल बा ।

निड्स नेपालके आयोजनामे हुइल कार्यक्रममे संस्थाके कार्यक्रम संयोजक विनोद कडारा परियोजनाके लक्ष्य उद्देश्य ओ समावेश करजैना क्षेत्रके बारेम जानकारी कराइल रहिट ।

परियोजनासे विदेशमे रोजगार गुमाके स्वदेश फर्कल ओ स्थानीय बेरोजगार युवाहे बजार मागमे आधारित कृषिमे स्वरोजगार कार्यक्रम संचालन कैना बा । युरोपियन युनियन ओ ब्रिटिश काउन्सिलके साझेदारीमे सञ्चालन हुइना परियोजनामे घोडाघोडीमे कुछ युवाहे कृषि (आईपीएम) तालिम, प्राविधिक ओ उत्पादनके बजारीकरणमे सहयोग करजैना बा ।

घोडाघोडी नगरपालिका नगरप्रमुख ममता प्रसाद चौधरी युवाहे देश भिटर रोजगारीके अवसरके सृजना कैना संघ संस्थाके योजनामे नगरपालिकाके सहभागीता, समन्वय ओ साझेदारी रहना प्रतिबद्धता व्यक्त करल रहिट । कार्यक्रममे घोडाघोडी नगरपालिका टमान शाखा प्रमुख, जनप्रतिनिधि ओ पत्रकारहुक्रनके सहभागीता रहल रहे ।