घर भसकके जोशीपुर साप्ताहिक पत्रिकाके कार्यालयमे क्षति

धनगढी, १६ सावन । लग्टारे परटी रहल पानीसे घर भस्कलपाछे जोशीपुर साप्ताहिक पत्रिकाके कार्यालयमे क्षति पुगल बा ।

कैलालीके जोशीपुर गाउँपालिकाके जोशीपुरसे प्रकाशित हुइटी आइल उ पत्रिकाके कार्यालय रहल घर शुकके रोज भस्कलपाछे क्षति पुगल हो ।

पत्रिकाके प्रकाशक/सम्पादक सुधराम दहितके अनुसार कार्यालय रहल घरके छप्रा टुटके गिरलपाछे २ थान कम्प्युटर, १ थान प्रिन्टर, १ थान दराज, टेबल, ४ थान प्लाष्टिक कुर्सी, २ थान पंखा, इन्टरनेट राउटरलगायत सामानमे क्षति पुगल बा ।

कार्यालयमे पुगल क्षतिसे पत्रिकाके नियमित प्रकाशन प्रभावित हुइना पत्रिकाके सम्पादक दहित दुखेसो सुनैलै । ३ दिन याहोर कैलालीके जोशीपुर गाउँपालिकासहित ठाउँ डुबानमे परल बा । बहुट धन जनके क्षति होसेकल बा ।