सिंहपुर युवा क्लबसे निःशुल्क कक्षा संचालन
सागर कुस्मी
गुलरिया, १९ सावन । कोरोना महामारीसे प्रभावित बालबालिकनके भविस्यहे मध्यनजर कैके आझसे कञ्चनपुरके कृष्णपुर नगरपालिका वडा नम्बर ६ सिंहपुर गाउँमे निःशुल्क कक्षा संचालन हुइल बावै ।
कक्षा संचालन सिंहपुर युबा क्लब सिंहपुरके आयोजनामे हुइल हो । कक्षा शिशुसे लेके दशसम संचालन हुइटी रहल क्लबके अध्यक्ष बाबुराम चौधरी जानकारी डेलैं । कोरोना महामारीके पाँच महिनासे विद्यालय बन्द बावै । उहाँ कहलैं– ‘लर्का पर्का बिग्रटी गैल ओर्से गाउँक् पर्हल युबन्हे क्लब मार्फत लर्कापर्का पर्ह्ना मे ध्यान लगाइँट ओ अपन भविस्य ना बिगारित कहिके कक्षा संचालन करल बटैलैं ।’
गाउँक् एक शिक्षित युबा दिलबहादुर चौधरीके संयोजनमे पर्हाइ हुइटी बा । ओस्टेके कक्षा संचालनमे जीवन चौधरी, कृश्नी चौधरी, मानमती चौधरी, अपसरा चौधरी, रेसम चौधरी लगायत सहजीकरण कर्टी बाटैं । कक्षा बिहान दस बजेसे साँझ ३ बजेसम हुइटी बावै ।
सामाजिक कार्यमे क्रियाशिल रहल क्लबसे इहिसे कुछ दिन पहिले क्लबके आयोजना मे गाउँ सरसफाइ ओ डगर मर्मत फेन हुइल रहे ।
