भजनीमे आभिन नाइ घटल बाढ, प्रभावितहुक्रनके हुलाकी सडकमे बास
सुधराम दहित
भजनी, १९ सावन । कैलालीके भजनी नगरपालिका कटान तथा डुबान क्षेत्रके मुख्य प्रभावित क्षेत्र अन्तरगत परठ् । यिहे साउन १४ ओ १५ गते आइल बाढसे भजनीके टमान वडा डुबान तथा कटान हुइल बा । जौन मध्ये वडा नं. ३ फेन बाढ तथा कटान ओ डुबानसे ढिउर प्रभावित हुइल बा । वडा नं. ३ अन्र्तगतके १३ गाउँ ढिउर प्रभावित हुइल वडा अध्यक्ष विक्रम चौधरी जानकारी डेलै ।
एक अँठ्वारसे उ क्षेत्र डुबानमे परल बा । लगातारके वर्षासे घट्टी रहल बाढ फेरसे आके गाउँ डुबान हुइल हो । वडा नं. ३ बाढ तथा डुबान ओ कटानसे ढिउर प्रभावित हुइनाके कारण कान्द्रा, मोहना, पठरैया ओ काँढा लडिया रहल जनाइल बा । चारओर लडियासे घरल वडामे करिव ५ सय घरधुरी रहल बा । जौन वडा अन्य वडासे ढिउर प्रभावित हुइल अध्यक्ष चौधरी बटैलै । डुबानसे यहाँके करिब ७५ प्रतिशत धानवाली नष्ट हुइल जनाइल बा ।
मौसम विभागसे डेहल पूर्व सुचना अनुसार साउन १३ गतेसे नै वडा अध्यक्ष, वडा सदस्य सहितके टोली पूर्व सावधानी ओ सचेतनाके लाग गाउँगाउँमे खटल जनाइल बा । बाढसे बचक लाग वडा अन्र्तगत जनताहे सुरक्षित ठाउँमे व्यवस्थापन कैना ३ ठाउँमे सेल्टर हाउस बनाईल बा । हुलाकी रोडके उच्च स्थान, बाढ पीडित सुरक्षित भवन नयाँ बस्ती दैलेखी टोल ओ राष्ट्रिय माध्यमिक विद्यालय ढुसीमे सेल्टर हाउस बनाईल बा । अब्बे ३ सय घर परिवार उहे सेल्टर हाउसमे विस्थापित हुइल जनाइल बा । जिहीसे मानविय क्षति हुइनासे बचल वडा अध्यक्ष चौधरी बटैलै ।
विस्थापित परिवारहे रासन, झुल, कम्मल, ब्ल्यांकेट लगायतके राहत सामग्री वितरण करल बा । विस्थापित मध्ये २ सय १० परिवारहे राहत वितरण करल बा । भजनी नगरपालिकाके विपद व्यवस्थापन कोषसे राहतके सामान खरिद करल बा । ओस्टके युनिसेफ, रेडक्रस सोसाईटी, लाईन्स क्लव धनगढी, दिगो विकास समाज भजनी, सिएसएसडी कैलाली, फाया नेपाल, वल्र्ड भिजन ईन्टरनेश्नल लगायत उद्योग वाणिज्य संघ कैलालीसे फेन राहतके सामग्री उपलब्ध कराके सहयोग करल अध्यक्ष चौधरी जानकारी डेलै ।
बाढसे प्रभावितहुक्रनके उद्धारके लाग नेपाली सेना, शसस्त्र बल ओ नेपाल प्रहरी फेन निरन्तर रुपमे खटल जनाइल बाब । चारठो ¥याप्टीङ्ग वोट, ८ ठो डुङ्गा, स्थानिय स्रोतसे ट्रयाक्टर तथा डल्लफके ट्युव प्रयोग कैके उद्धार करटी रहल बा ।
अध्यक्ष चौधरी बाढीसे बचक लाग प्रत्येक वडामे १/१ स्टीमर आवश्यक रहल बटैलै । यी बरस बाढसे किसानहुक्रनके खाद्य संकट आइ सेक्ना कहटी सहयोगी सक्कु निकाय, संघसंस्थाहे सहयोगके लाग अपिल करल बा । किसानहुक्रनहे चैते धान खेती ओ गहुखेतीमे विशेष जोड डेना आग्रह ओ किसानहे नगरपालिका ओ वडासे हुइना सहयोग कैना अपने तत्पर रहल वडा अध्यक्ष चौधरी बटैलै ।
बाढके प्रभावसे आइ सेक्ना स्वास्थ्य समस्याके लाग प्राथमिक स्वास्थ्य केन्द्र भजनी ओ स्वास्थ्य शाखा भजनीसे समन्वय कैके गाउँ गाउँमे स्वास्थ्यकर्मीके मोबाईल टोलीहे परिचालन करल जनाइल बा ।
