कोरोना डेखलपाछे गाउँपालिकाहे अनिश्चितकालके लाग लकडाउन
हसुलिया, २१ साउन । कैलालीके कैलारी गाउँपालिकाहे अनिश्चितकालके लाग लकडाउन करल बा ।
मंगरके गाउँपालिकास्थित क्वारेन्टाइनमे कार्यरत एक जने स्वास्थ्यकर्मीसहित चौकीदार ओ भन्सरिया लगायत ७ जनहनमे कोरोना भाइरस सङ्क्रमण डेखलपाछे बुधके बैठल गाउँपालिकाके बैठकसे आजसे लागू हुइना मेरके गाउँपालिकाहे अनिश्चितकालके लाग लकडाउन करल हो ।
वडा नं. ७ के वडा अध्यक्ष तथा गाउँपालिकाके प्रवक्ता कमलप्रसाद चौधरी सरकारके नियमहे फलोअप करटी कोरोना रोकथाम तथा नियन्त्रणके लाग गाउँपालिकाहे लकडाउन करल जानकारी डेलै । उहाँ लकडाउनके बेला अत्यवाश्यक काम बाहेक घर बाहर नाइ निक्रना ओ भीडभाड नाइ कैना प्रवक्ता चौधरी गाउँपालिकाबासी सक्कु जनहनहे आग्रह करले बाटै । यकर साथे उहाँ सामाजिक दुरी कायम कैना, सक्कुजनहनहे मास्क लगैना ओ सरसफाईमे ध्यान डेना फेन आग्रह करलै ।
वडा नम्बर १ के हसुलियास्थित दीपेन्द्र माध्यमिक विद्यालयमे बनाइल क्वारेन्टाइनमे कार्यरत एक/एक जने स्वास्थ्यकर्मी, चौकीदार ओ भन्सरियाकमे मंगरके कोरोना भाइरस संक्रमण पुष्टि हुइल रहे ।
स्वास्थ्यकर्मीसहित क्वारेन्टाइनमे काम करुइया व्यक्तिमे कोरोना संक्रमण पुष्टि हुइलपाछे उहाँहुक्रनके ‘कन्टयाक्ट’ मे आइल कर्मचारी, परिवारके सदस्य ओ अन्य स्थानीयके फेन स्वाब परीक्षणके लाग संकलन करटी रहल गाउँपालिका जनैले बा ।
