मानवअधिकार रक्षकहुकनके अनुभव आदानप्रदान
पहुरा समाचारदाता
धनगढी,२२ सावन । अनौपचारिक क्षेत्र सेवा केन्द्र (इन्सेक) सुदूर पश्चिमप्रदेश कार्यालय धनगढीके अयोजनामे डिसीएके सहयोगमे कैलालीमे लकडाउनके अवधिमे काम करल मानव अधिकार रक्षकहुकनके अनुभव आदानप्रदान तथा छलफल कार्यक्रम हुइल बा ।
कार्यक्रममे इन्सेकके प्रदेश संयोजक संयोजक खडकराज जोशी सुदूरपश्चिम प्रदेशमे मानवअधिकार रक्षक पीडितहुकनके पक्षमे काम करेबेर टमान मेरिक समस्यामे पर्ना बटैलै । उहाँ प्रदेश सरकारसंग छलफलके लाग ओ मानवअधिकार रक्षकहुकनके काम कर्तव्य, जिम्मेवारी तथा सुरक्षाके लाग नमुना बिधेयक तयार पारल बटैलै । कार्यक्रममे ओरेक नेपालके कार्यक्रम संयोजक गीता चौधरी सेफ हाउसमे धारल पीडितहुकनहे बयान बदलेक लाग दवाव अइना करल बठैली ।
लकडाउनके अवधिमे जघन्य अपराधके मुद्दाफे प्रहरीसे मिलापत्रमे टुङग्यइना करल सीविन नेपालके कार्यक्रम संयोजक हरीलाल चौधरी बटैलै ।
दलित महिला अधिकार मंचके अध्यक्ष साबित्रा घिमिरे बलात्कार जैसिन घटनाके मुद्दा दर्ता हुइलेसेफे प्रहरीके लापरवाहीके कारण आरोपित नम्मा समयसमफे गिरफतार नइहुइल बटैली ।
अनौपचारिक क्षेत्र सेवा केन्द्र (इन्सेक)के प्रलेख अधिकृत कृष्णबहादुर बिक मानवअधिकारके क्षेत्रमे काम कैना सक्कु संघसंस्थाहुक्रे पीडितहे उचित न्याय ओ आरोपितहे कारवाहीके लाग संगठित हुके राष्ट्रिय मानवअधिकार आयोगसंग समन्वय करके जैना आवश्यक रहल बटैलै ।
उ कार्यक्रममे मानव अधिकारके क्षेत्रमे काम कैना संघसंस्थाके प्रतिनिधित्व हुइना करके मानवअधिकार रक्षकहुकनके समन्वयमे सहजताके लाग मानव अधिकारका लागि एकल महिला समुहके कार्यक्रम संयोजक बेद अवस्थीके संयोजकत्वमे नौ सदस्यीय मानवअधिकार रक्षक सञ्जाल गठन करल बा ।
