थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०१ भादौ २६४६, बुध ]
[ वि.सं १ भाद्र २०७९, बुधबार ]
[ 17 Aug 2022, Wednesday ]

हसुलिया–मसुरिया सडक मर्मतके काम आघे बह्रल

पहुरा | २२ श्रावण २०७७, बिहीबार
हसुलिया–मसुरिया सडक मर्मतके काम आघे बह्रल

नगढी, २२ सावन । कैलालीके मसुरिया–हसुलिया सडक खण्ड मर्मत सम्भारके काम आघे बह्रागिल बा ।

ठाउँ–ठाउँमे खोल्टै खोल्टा ओ हिल्लै किल होके आवातजावात करे नैमिल्ना मेरके बिग्रल उ सडकके मर्मतके काम आघे बह्रागिल हो ।

कैलारी गाउँपालिकाके इन्जीनीयर भरत चन्दके अनुसार हसुलिया मसुरिया सडक खण्डके साथे गाउँपालिकाके टमान वडामे बिग्रल सडक मर्मतके काम आघे बह्रागिल बा ।

२ दिन याहोर घाम लागलपाछे उ सडक खण्डके मोहनी बजार, लोहरपुर, बेनौली बजार, कैलारी बजार क्षेत्रमे बिग्रल सडक बन्टी रहल इन्जीनीयर चन्द जानकारी डेलै ।

गाउँपालिकाके वडा नं. ५ के पवेरा, वडा नंं. ६ के बनकट्टा, वडा नं. ९ लगायत वडामे मर्मतके काम हुइटी रहल जनागिल बा ।

आवातजावातहे बहुट जल्डी सहज बनैना उदेश्यसे ४ दिनभिट्टर मर्मत सम्भारके सक्कु काम सम्पन्न करके छोर्ना इन्जीनीयर चन्द बटैलै ।

समयमे मर्मत सम्भारके काम नैहुइलपाछे उ सडकमे आवातजावात बहुट कष्टकर बनल रहे । कलेसे सम्बन्धित निकायसे मर्मतके काममे ढिलाइ हुइटी गैल रहे । काममे ढिलाइ हुइटी गैलपाछे पहुरा थारु दैनिक तथा पहुरा थारु दैनिकके अनलाइन संस्करणमे मर्मत सम्भारमे चरम ढिलासुस्ती कहिके समाचार प्रकाशन हुइल रहे । ओकरपाछे कामके गतिहे तीब्र पारगिल हो ।

उ १९ किलोमिटर सडक खण्डके जिरो पोइन्ट रहल पूर्वपश्चिम महेन्द्रराजमार्गस्थित बडैपुरसे लौसा गाउँसम करिब साढे ३ किलोमिटर सडक यहिसे पहिले कालोपत्रे होसेकल बा । मने बाँकी सडक मजासे ग्राबेलसम नैहुई सेकलपाछे आवातजावात कर्ना मनैनहे बहुट दुख हुइटी आइल रहे ।

उ सडकमे एम्बुलेन्स समेत नेगे छोरसेकल रहे । जौनकारण अकालमे ज्यान गुमाइक पर्र्ना अवस्था समेत सिर्जना हुइलपाछे स्थानीय जनता बहुट दुखी हुइना संगे आक्रोशित समेत हुइल रहिट ।
उ सडकखण्ड जिल्लाके गौरीगंगा नगरपालिका, कैलारी गाउँपालिका ओ धनगढी उपमहानगरपालिका जोर्ना प्रमुुख सडक हो । मने उ हिलाम्मे सडक कैलारी गाउँपालिकाके क्षेत्रभिट्टर परठ ।

स्थानीयबासी उ सडक तत्काल कालोपत्रे कर्नासे फेन, मजासे नेंगे सेक्ना मेरके बनाइक पर्ना माग करटी आइल बाटै । मने समयमे जनताहुकनके पीर मर्का सरकारी निकाय नैबुझ्ल कहटी स्थानीय जनता आक्रोशित समेत हुइटी आइल बाटै ।

कैलारी गाउँपालिका यी सडक मर्मत सम्भारके लाग २ खण्डमे ठेक्का डेहल रहे । लौसा गाउँसे बेनौली पेट्रोल पम्पसम ओ बेनौली पेट्रोल पम्पसे बरका मुुडासम मर्मत सम्भारके ठेक्का ठाकुर कन्ट्रक्सन हसुलिया पैले बा ।

कालोपत्रेके लाग ठेक्का
उ सडक कालोपत्रेके लाग फेन ठेक्का समझौता होसेकल जनागिल बा । निर्माण कम्पनी संग कालोपत्रेके लाग आव २०७६÷२०७७ के अन्तिमओहोर ठेक्का समझौता हुइल सडक डिभिजन कार्यालय कञ्चनपुर जनैले बा । डिभिजन कार्यालयके सूचनाअ अधिकारी एंव इन्जीनियर लक्ष्मणदत्त जोशीके अनुसार संघीय सरकारके प्रत्येक निर्वाचन क्षेत्रमे सडक कालोपत्रे कर्ना योजना अनुसार १० करोडके इस्टीमेट अनुसार कालोपत्रे हुइना हुइल हो ।

५ खण्डमे विभाजन करके उ सडक कालोपत्रे हुइना हुइल बा । जेकर लाग फागुनमे ठेक्का आ≈वान हुइल जनागिल बा । जौन २०७७ चैत्र १५ गतेभिट्टर निर्माण सम्पन्न करेक पर्र्ना ठेक्का समझौता हुइल सूचना अधिकारी जोशी बटैलै । कालोपत्रेके लाग मल्ल निर्माण सेवालगायत निर्माण व्यवसायी ठेक्का पैले बाटै ।

जनाअवजको टिप्पणीहरू