थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २२ अगहन २६४६, बिफे ]
[ वि.सं २२ मंसिर २०७९, बिहीबार ]
[ 08 Dec 2022, Thursday ]

मुक्तकमैया ओ बादीहुकनके रखाइल बनुवाभिट्टर तोडफोड

पहुरा | २२ श्रावण २०७७, बिहीबार
मुक्तकमैया ओ बादीहुकनके रखाइल बनुवाभिट्टर तोडफोड

धनगढी, २२ सावन । अति विपन्न वर्गके रुपमे चिन्जैना मुक्तकमैया ओ बादी सामुदायसे संरक्षण करके बचाइल सामुदायिक वनुवाभिट्टर तोडफोड हुइल बा ।

कैलालीके लम्की चुहा नगरपालिका–३ बलचौरस्थित मुक्तकमैया सामुदायिक वन उपभोक्ता समूहके सुरक्षार्थ करल तारबार उखारके फेकागिल बा । कलेसे कामे नैलग्ना मेरके तोडफोड करगिल हो ।

समूहके कोषाध्यक्ष दिपु चौधरीके अनुसार तार काटके फेकैनाके साथे तार लगाइक लाग गारल १ हजारसे ढिउर सिमेन्टके पोल नष्ट करगिल बा ।

२०६५ पहिले उ वन क्षेत्र अतिक्रमणके चपेटामे पर्नाके साथे गौचरणके रुपमे परिणत हुइल रहे । कलेसे लग्गेही रहल चुरे क्षेत्रसे वहुमूल्य काठ तस्करी ओ वन्यजन्तुन्के चोरी शिकार हुइटी आइल रहे ।

मने उहाँ बैठल मुक्तकमैया ओ बादी समुदाय संरक्षणमे जुटलपाछे बनुवाक् मुहार फेरके हराभरा किल नाई हुइल, चोरी शिकार समेत नियन्त्रणमे आइल कोषाध्यक्ष चौधरी बटैठै ।

मने चोरी शिकार करे नैपाइलपाछे वन रखाइक लाग बनाइल संरचनामे तोडफोड करल हुई सेक्ना उहाँके कहाइ बा ।

उहाँ कहलै–‘हमार रखाइल बनुवा सबसे मजा हुइटी गैल बा । मने मजा डेखे नैचाहना मनै सुनियोजित ढंगसे तोडफोड करल हुइट । पूरा आधुनिक अतियारसहित आइल समूहसे तोडफोड करगिल बा । यी घटना हमार मेहनत उप्परके प्रहार हो ।’ सावन २० गते रातके उ संरचना भत्काइल जनागिल बा ।

ओस्टके, वन सरक्षणकर्मी पुष्कल बम बचाइक लाग तयार पारल संरचना तोडफोडहे गैरमानवीय क्रियाकलापके रुपमे रहल बटैले बाटै । घटनामे संलग्न पक्षहे कारवाहीके लाग सम्बन्धित निकायसे माग करल बम बटैलै ।

उहाँ बसोबास करटी आइल मुक्तकमैया ओ बादी समुदाय २०६५ से बनुवाक् संरक्षण करटी आइल हुइट । कलेसे ४५६ दशमलव १९ हेक्टर क्षेत्रफलमे फैलल उ बनुवा २०७२ मे समूहमे हस्तान्तरण हुइल हो ।

उ बनुवा ३५० घरधुरी मुक्तकमैया ओ बाँकी वादी समुदाय करके साढे ४ सय घरधुरी संरक्षण करटी आइल बाटै ।

जनाअवजको टिप्पणीहरू