थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २२ अगहन २६४६, बिफे ]
[ वि.सं २२ मंसिर २०७९, बिहीबार ]
[ 08 Dec 2022, Thursday ]

कैलारीके कर्मचारीसहित पाँच जाने जिटलै कोरोना

पहुरा | २५ श्रावण २०७७, आईतवार
कैलारीके कर्मचारीसहित पाँच जाने जिटलै कोरोना

पहुरा समाचारदाता
हसुलिया, २५ सावन ।
कैलालीके कैलारी गाउँपालिकाके कर्मचारीसहित पाँच जाने १२ दिनमे कोरोना जिटले बाटै ।
गाउँपालिकामे कार्यरत ल्याब टेक्निसियन, दीपेन्द्र माध्यमिक विद्यालयके चौकीदार ओ क्वारेन्टाइनमे खाना पकुइया कामदार १२ दिनमे कोरोना जिटल हुइट । ओस्टेक करके, कोरोना जिटुइयामे भारतसे लौटल दुई जाने स्थानीय व्यक्तिफे रहल बाटै ।

सावन १३ गते उहाँ सक्कुहुनके स्वाब नमूना संकलन करल रहे । २० गते स्वाब परीक्षणके रिपोर्ट आइल रहे । संक्रमिट सात जाने मन्से ठिक हुइल स्वास्थ्यकर्मीसहित पाँच जनहनहे अँटवार घर पठाइल गाउँपालिकाके स्वास्थ्य संयोजक वीरेन्द्र सापकोटा जानकारी डेलै । उहाँ आब दुई जाने केल कोरोना जिटना बाँकी रहल उल्लेख करलै ।

यिहे्बीच, संक्रमिट हुइल स्वास्थ्यकर्मी लगायतके व्यक्तिके सम्पर्कमे आइल १५२ जानेक स्वाब रिपोर्ट नेगेटिभ आइल बा । कन्ट्याक्ट ट्रेसिङ करल ८४ जानेक परीक्षण रिपोर्ट शुकके आइल रहे । ६८ जानेक रिपोर्ट अँटवार आइल बा । कन्ट्याक्ट ट्रेसिङमे परल बैंकके ११ जाने कर्मचारीसहित क्वारेन्टाइनमे रहल व्यक्ति ओ क्वारेन्टाइन लग्गेक समुदायके करके ७० जानेक स्वाब नमूना परीक्षणके लाग अँटवार पठाइल सापकोटा जानकारी डेलै ।

उ गाउँपालिकामे कर्मचारीसहितके व्यक्तिमे कोरोना संक्रमण पुष्टि हुइलपाछे रोकथाम ओ नियन्त्रणके लाग सावन २१ गतेसे गाउँपालिकामे बन्दाबन्दी जारी करल रहे । पाँच जाने संक्रमिट ठिक हुसेकल ओ कन्ट्याक्ट ट्रेसिङमे परलहुकनके रिपोर्ट नेगेटिभ आइल ओरसे बन्दाबन्दीहे खुकुलो कैना गाउँपालिकाके अध्यक्ष लाजुराम चौधरी बटैलै । ‘सोम्मार सकारे सर्वपक्षीय बैठक बोलैले बाटी, उहाँ कहलै । ‘थप सुरक्षाके लाग मापदण्ड अनुसारके उपाय अपनैना ओ बन्दाबन्दी खुकुलो बनैना सवालमे बैठकमे छलफल हुई ।’

चाडपर्व लग्गे हुइलसंगे भारतसे लौटना क्रम फेर बह्रल ओरसे थप सुरक्षा सतर्कता अपनैना आवश्यक रहल अध्यक्ष चौधरी जनैलै । उहाँ आब विद्यालयहे क्वारेन्टाइनके रुपमे प्रयोग करे नाइसेक्ना हुइल कारण समुदायिक भवन प्रयोग करेक लाग वडा कार्यालयहुकनहे निर्देशन डेहल उल्लेख करलै । ‘विद्यालयहे आब क्वारेन्टाइनके रुपमे प्रयोग करे नइसेक्जाई’, चौधरी कहलै । ‘वडामे रहल सामुदायिक भवनमे क्वारेन्टाइन ओ आइसोलन बनाइक लाग सक्कु वडाहे पत्र पठैले बाटु ।’

जनाअवजको टिप्पणीहरू