पहिरो पीडितके राहत संकलन अभियान सुरु
पहुरा समाचारदाता
धनगढी, २८ सावन । बाजुरामे आइल बाढपहिरोके पीडितके लाग पदम खत्री स्मृती प्रतिष्ठान बाजुरासे राहत संकलन अभियान सुरु करले बा ।
प्रतिष्ठानसे बुधके धनगढीमे एक कार्यक्रमके आयोजना कैके राहत संकलन अभियान थालनी करल पदम खत्री स्मृती प्रतिष्ठान बाजुराके अध्यक्ष अमरसिंह खत्री जानकारी डेलै ।
अभियान अन्तरगत बुधके किल बडिमालिका ट्रेडिङ ईन्टरप्राईजेजके संचालक राजेन्द्र खत्री ११ हजार पाँच सय, वानस्टप अटोमोवाईल प्रालिके संचालक अभियन खड्का १० हजार एक सय ११, शुभश्री बडिमालिका ट्रेड सेन्टरके संचालक तथा नेपाली काँग्रेस बाजुराके सचिव रनसिंह बहादुर अयडी पाँच हजार एक सय, चर्चित डेउडा गायक नरेन्द्रराज रेग्मी तीन हजार एक सय ११ सहयोग करले बाटै ।
ओस्टके स्व. पदम खत्रीके छावा साउदी अबरमे रोगजार रहल नरेन्द्र खत्री १० हजार, हाल दिल्ली निवासी लछी खत्री पाँच हजार, एएलबी ट्रेड एण्ड सप्लायर्स प्रालिके लोकेन्द्र खत्री पाँच हजार एक सय ११ तथा एमएडब्लु भिर्दीके आधिकारिक बिक्रेता जयमष्टा अटोमोटभ्सि प्रालिके खेम रावत पाँच हजार एक सय ११ आर्थिक सहयोग करले बाटै ।
राहत संकलन अभियानके आरम्भ कार्यक्रममे पदम खत्री स्मृति प्रतिष्ठानके सल्लाहकार संयोजक कर्णबहादुर थापा, नेपाली काँग्रेस बाजुराके सचिव रनसिहबहादुर अयडी, नेवि संघ कैलाली बाजुरा सम्पर्क समितिके अध्यक्ष अशोक थापा, सदस्य नवराज खत्री, गोकुल शाह ओ बडिमालिका ट्रेडिङ ईन्टरप्राईजेजके संचालक गोविन्दराज रेग्मी उपस्थिती रहल रहिट ।
बुधके सुरु करल अभियान टमान स्थानसे राहत संकलन कैके भदौ पहिल अँठ्वार भित्रे बाढपीडितहुक्रनहे हस्तान्तरण कैना पदम खत्री स्मृती प्रतिष्ठानके कोषाध्यक्ष राजेन्द्र खत्री जानकारी डेलै ।
