सुदूरपश्चिममे १० जाने संक्रमिट ठप्लै
पहुरा समाचारदाता
धनगढी, २९ सावन । सुदूरपश्चिम प्रदेशमे विफेक रोज १० जाने कोरोना संक्रमिट ठपल बाटै । सेती प्रादेशिक अस्पतालके प्रयोगशालामे ८ जाने ओ डडेल्धुरा अस्पतालमे २ जनहनमे कोरोना पुष्टि हुइल बा ।
सेती प्रादेशिक अस्पतालके प्रयोगशालामे कैगिल परिक्षणमे साँफेबगर–३ अछामके दुई पुरुष, लम्कीचुहा–३ कैलालीके एक पुरुष, धनगढी–१ कैलालीके तीन पुरुष, भीमदत्तनगरपालिका–७ कञ्चनपुरके एक महिला, शुक्लाफाँटा–१ कञ्चनपुरके एक महिला करके आठ जनहनमे कोरोना पुष्टि हुइल हो । ४ सय ७९ जनहनमे करल परिक्षणमे आठ जनहनमे कोरोना संक्रमण विल्गाइल सेती प्रादेशिक अस्पतालके सूचना अधिकारी दिलिप श्रेष्ठ जनैलै ।
ओस्टेक डडेल्धुरा अस्पतालमे बैतडी सिगासके एक पुरुष, दिपायल सिलगडी डोटीके एक पुरुषमे कोरोना पुष्टि हुइल बा । ३ सय ५२ जनहनमे करल परिक्षणमे २ जनहनमे पोजेटिभ डेखल डडेल्धुरा अस्पताल कोभिड–१९ परिक्षण प्रयोगशालाके इन्चार्ज ईश्वरी प्रसाद भुषाल जनैलै ।
देशभर ५ सय २५ कोरोना संक्रमित ठप्लै
मुलुकभर ५ सय २५ कोरोना संक्रमित ठपल बाटै । पछिल्का २४ घन्टामे ५ सय २५ जनहनमे कोरोना संक्रमण पुष्टि हुइल स्वास्थ्य तथा जनसंख्या मन्त्रालय बिफेक रोज जनैले बा ।
यी संंगे नेपालमे कोरोना भाइरससे संक्रमितके संख्या २४ हजार ९ सय ५७ पुगल बा । गैल २४ घन्टामे १०९ जाने ठिक हुके घर लौटल बाटै । हालसम १६ हजार ८ सय ३७ ठिक हुइल बाटै ।
यी कुल संक्रमितके ६७ दशमलव ५ प्रतिशत रहल प्रवक्ता डा जागेश्वर गौतम जानकारी जनैलै ।
देशभर सक्रिय संक्रमितके संख्या ८ हजार २५ जाने रहल बाटै । क्वारेन्टाइनमे १४ हजार ७ सय ६९ जाने रहल बाटै ।
२४ घन्टामे ९ हजार ८ सय ५९ पीसीआर परीक्षण हुइल बा । हालसम ४ लाख ८३ हजार २८ परीक्षण हुइल मन्त्रालयके प्रवक्ता गौतम जनैलै ।
कोरोना संक्रमणसे मृतकके संख्या ९५ पुगल
नेपालमे कोरोना भाइरस (कोभिड–१९) से २४ घन्टामे ४ जानेक ज्यान गैल बा । स्वास्थ्य तथा जनसंख्या मन्त्रालयके अनुसार महोत्तरी, धनुषा, अछाम ओ मोरङ जिल्लामे १÷१ जाने करके ४ जनहनके ज्यान गैल हो ।
मन्त्रालयके प्रवक्ता डा. जागेश्वर गौतमके अनुसार धनुषाके मिथिला नगरपालिका ७ ढल्केवरके ८५ वर्षीया महिलाके सावन २८ गते बीपी कोइराला स्वास्थ्य विज्ञान प्रतिष्ठानमे उपचारके क्रममे ज्यान गैल बा ।
ओस्टेक अछामके रामारोशन गाउँपालिका—५ के १८ वर्षीय किशोरके सावन २८ गते पाटन स्वास्थ्य विज्ञान प्रतिष्ठानमे उपचारके क्रममे मृत्यु हुइल बा । उहाँ मुटुरोगसे ग्रसित रहिट ।
मोरङके विराटनगर महानगरपालिका—३ के ५७ वर्षीय पुरुषके सावन २८ गते कोसी अस्पतालमे उपचारके क्रममे मृत्यु हुइल बा । उहाँ मधुमेह ओ उच्च रक्तचापसे ग्रसित रहिट । ओस्टेक करके महोत्तरीके महोत्तरी मटिहानी नगरपालिका ६ के ४५ वर्षिय पुरुषके सावन २५ गते मृत्यु हुइल उहाँ बटैलै । क्षयरोग ओ मधुमेहके ग्रसित उहाँक राज जानकी अस्पतालमे उपचारके क्रममे मृत्यु हुइल हो ।
