जोशीपुरमे जनता समाजवादी पार्टीके कार्यकर्ता भेला
सुधराम दहित
जोशीपुर, ३२ सावन । कैलालीके जोशीपुरमे जनता समाजवादी पार्टी नेपालके कार्यकर्ता भेला तथा परिचयात्मक कार्यक्रम सम्पन्न हुइल बा ।
कार्यक्रम छेदुलाल चौधरीके घरगोसियाइमे हुइल रहे । कार्यक्रमके बर्का पहुना सुदूरपश्चिम प्रदेश सदस्य कृष्णबहादुर चौधरी रहल रहिट । राष्ट्रिय जनता पार्टी ओ समाजवादी पार्टी समायोजन होके जनता समाजवादी पार्टी गठबन्धन हुइलपाछे पश्चात कैलालीमे कार्यकर्ता भेला तथा परिचयात्मक कार्यक्रम पहिलचो हो ।
राष्ट्रके बरवार टिसरा पार्टीके रुपमे रहल जनताके हकहितके लाग सदैव अग्रसर रहना ओ संघीयता, सुशासन, समृद्धि ओ समाजवाद मुख्य मिसन भिजन रहल कार्यक्रममे बोलुइया वक्ताहुक्रे बटाइल रहिट । कार्यक्रममे बोलुइया वक्ताहुक्रे बाढ पीडित तथा किसानके समस्याहे सरकार वेवास्ता करल फेन बटाइल रहिट । ओस्टके सांसद रेशम चौधरीके अनुपस्थितिसे यहाँके जनता नेतृत्व विहिन हुइल ओ विकासमे अवरोध हुइटी रहलमे दुःख व्यक्त करल रहिट ।
पार्टीहे बलगर बनाइक लाग गाउँ टोल, युवा, कृषक, व्यापारीके समूह बनाके संगठीत हुइना आवश्यक रहल फेन उहाँहुक्रे बटाइल रहिट । कार्यक्रममे करिव २ सय ढिउरके उपस्थिति रहल रहे ।
यिहे बिच जोशीपुर बजारमे पार्टी कार्यालय स्थापना करल बा । जेकर उद्घाटन केन्द्रीय सदस्य फोनी राम चौधरी करल रहिट । कार्यक्रममे खास पहुना पूर्व सांसद कृष्णकुमार चौधरी, केन्द्रीय सदस्य फोनी राम चौधरी, पशुपति चौधरी, हेमन्त मन्डव्य, सुशीला चौधरी, केन्द्रीय परिषद सदस्य दिल्लीराज जैसी, दीपेन्द्र शाही, वरिष्ठ नेता फागुराम चौधरी रहल रहिट ।
ओस्टके पूर्व जिल्ला अध्यक्ष गंगाराम चौधरी, गयाप्रसाद कुश्मी, जनता समाजवादी पार्टी थारु परिषद केन्द्रीय उपाध्यक्ष धनश्याम कुश्मी, महासचिव राजाराम चौधरी, केन्द्रीय सदस्य जनकराज चौधरी, प्रदीप शोक, प्रदेश सदस्य चन्द्र प्रकाश चौधरी, फुलमति चौधरी, गोविन्द राना लगायत स्थानीय, क्षेत्रीय, जिल्ला, प्रदेश तथा संघके वरिष्ठ नेताहुक्रनके उपस्थिति रहल रहे ।
